Synopsis: News bits from the past week: Brashton Satele signs to play professional football; Akaka Bill; President Obama’s request; closure of Maunaloa Elementary School on Moloka‘i; taking care of our iwi kupuna; Kawika Shoji, the best in the nation.

Ua 'ike 'ia nā 'ai a ka u'i. Pūlima aku nei 'o Brashton Satele i ka palapala 'aelike no 'ekolu makahiki me nā Jets o Nū Ioka. Ua makemake 'ia 'o Satele ma hope o kona ho'oma'ama'a 'ana me lākou no 'ekolu mau lā. Ua piha hau'oli 'o ia i ka pūlima 'ana no ka mea, e pā'ani hou ana i ke kinipōpō pekupeku.

Akāka ‘ole. Ma kahi ana mana'o i mālama 'ia, ua nīnau 'ia he 604 mau kānaka i ke kāko'o a me ka 'ole paha i ka 'ike 'ia 'ana o ka lāhui Hawai'i he lāhui kū'oko'a ia e ke aupuni pekelala a me ka 'Aha'ōlelo Lāhui, e like me nā Kānaka Maoli o 'Amelika a me 'Ālaka. A he 66% o ia mau kānaka, aia nō ke kāko'o nei i ia mana'o.Wahi a Dennis Pu'uhonua “Bumpy” Kanahele, he hō'ike wale nō ia i ka maopopo 'ole o ka pila Akaka i nā kānaka.

He noi ma ke alo? E noi ana ka Pelekikena Barrack Obama i ko Honolulu, e koho i Kemokalaka no ke kūlana 'Aha'ōlelo Lāhui e waiho wale nei. Ua maka'u nā Kemokalaka a puni 'o 'Amelika, o lilo ia kūlana iā Charles Djou, he Lepupalika. 'O kahi pilikia, he 'elua Kemokalaka e alualu nei i ia kūlana, 'o Ed Case lāua 'o Colleen Hanabusa.

No ka pono o nā keiki. 'A'ole paha maika'i ke pani loa 'ia 'ana o ke Kula Ha'aha'a o Maunaloa ma Moloka'i. 'O ia wale nō ke kula ha'aha'a o ka 'ao'ao komohana o Moloka'i. Inā e pani 'ia, he pono ke holo kona mau haumāna he 61 i nā mile he 15 i ke kula, ma laila ke kula kokoke loa. A pēlā pū nō me ka ho'i ‘ana i kauhale, 'O ka mea 'āpiki, 'a'ole nō e nui loa ke kālā e mālama 'ia ana, ke hana pēlā.

Mālama Iwi Kupuna. Ma mua o ka ho'omaka 'ana o ke kūkulu 'ana i ke ala o ke ka'a uila kau i ka lewa, he pono i nā luna o ke kūlanakauhale o Honolulu e noi'i aku i ka loa'a me ka 'ole paha o nā wahi kanu iwi a me nā 'āina waiwai 'ē a'e ma ke ala holo'oko'a o ia ka'a uila ma mua o ka ho'omaka o ke kūkulu 'ana. Ke kū'ē nei ka 'Aha Kanu Iwi Kupuna o O'ahu i ka holo 'ana o ia ka'a uila ma o Kaka'ako, no ka mea, ua kanu 'ia paha nā iwi kupuna ma laila. Ke mana'o nei nā luna kūlanakauhale, e ho'omāhelehele 'ia ka noi'i 'ana, 'o ia ho'i, inā 'a'ohe iwi ma ka ‘āpana mua, e kūkulu 'ia nō ia 'āpana. A aia wale nō a pau ke kūkulu 'ia 'ana o ia māhele, a laila, e noi'i 'ia ka māhele ‘elua, a pēlā aku. Akā ke mana'o 'ia nei he hana 'āpiki ia. Inā e hana 'ia pēlā, a e loa'a ka iwi ma kekahi māhele o waena, e 'ōlelo paha nā luna kūlanakauhale, e ho'one'e 'ia nā iwi kupuna. He keu a ka ma'alea.

Kū kilakila. Kau aku nei 'o Kawika Shoji i ka hano hāweo, 'o ia ke kāne pā'ani kinipōpō pa'ilima 'oi o 'Amelika. He mea pā'ani 'o Kawika no Kanapola. He keiki 'o ia na Dave Shoji, a ua puka 'o ia mai ke kula ki'eki'e 'o 'Iolani i ka makahiki 2006. A luku aku nei 'o Kanapola iā 'Ohaio State ma loko o nā pā'ani 'ekolu wale nō i ka pō Pō'ahā nei. No laila, komo akula i loko o ka puni inoa moho. A 'o kona hoa paio ma laila, 'o ia nō nā Liona o Penn State i lanakila aku nei ma luna o Cal State, ka hui helu 'elua o ke ao nei, ma loko o nā pā'ani ‘ekolu wale nō.

E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:
» .(JavaScript must be enabled to view this email address)
» .(JavaScript must be enabled to view this email address)
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai'i at Mānoa, supported by the Initiative for Achieving Native Hawaiian Academic Excellence.