Synopsis: The Akaka Bill seeks to whitewash history by denying the sovereign status of the Hawaiian Kingdom in contradiction to treaties between the Kingdom and the U.S. and the Cleveland-Lili'uokalani Agreement. It also seeks to turn a national issue into an ethnic one.

I loko o Kekemapa o ka 2009 ho'opuka akula ka Hale o ka 'Aha 'Ōlelo o Wākinekona i kekahi mana o ka Pila Akaka e kāohi ana i ka po'e i ka ho'opi'i i ke aupuni 'Amelika no nā 'āina i kā'ili 'ia mai ka 1898 mai. I loko o ua pila nei, 'a'ohe wahi hō'ike he 'āina kū'oko'a ko Hawai'i Pae'āina. 'O kēia nā ku'ikahi ma waena o 'Amelika Hui 'ia a me ke Aupuni Mō'ī Hawai'i:

1849: he ku'ikahi ho'ohoaloha, 'oihana kālepa, a me ka holomoana.

1875: he ku'ikahi pāna'i like.

1883: he ku'ikahi pili i ka ho'ouna pepa kīko'o hale leka.

1884: he ku'ikahi ho'akaka hou i ke ku'ikahi o ka 1875.

Kūkulu 'ia he mau ku'ikahi ma waena o ke Aupuni Mō'ī Hawai'i a me ke Aupuni Mō'ī o Suedena me Nolewai i ka 1852 a me ke Aupuni Mō'ī o Sepania i ka 1863 e hō'ike ana i ke kūlana kū'oko'a o ke Aupuni Mō'ī Hawai'i. No laila, nānā 'ia nō ke Aupuni Mō'ī Hawai'i he aupuni kū'oko'a i like ke kūlana me 'Amelika Hui 'ia.

I ka lā 18 o Kekemapa o ka 1893, hō'ike Pelekikena Grover Cleveland i ka 'Aha 'Ōlelo o Wākinekona he hewa ko'iko'i loa ka hana a ko 'Amelika pū'ali koa i ke kōkua i ka hana kipi kū'ē i ke Aupuni Mō'ī Hawai'i ma Honolulu i ka lā 14 o Ianuali o ia makahiki nō. Ho'ohiki 'o ia i ka Mō'ī Wahine Lili'uokalani e ho'iho'i nō 'o ia i ko Lili'u aupuni ma ka noho aupuni a e uku 'o ia i ke koi pohō e pono ai. A hiki i kēia lā, 'a'ohe wahi ku'ikahi ho'ohui 'āina ma waena o ke Aupuni Mō'ī a me 'Amelika.

'A'ole i hō'ike 'ia ma kekahi wahi o ka Pila Akaka no ka nele o kekahi ku'ikahi ho'ohui 'āina ma waena o ke Aupuni Mō'ī a me 'Amelika. Ho'opane'e 'ia ua pila nei me he mea lā he 'āpana 'o Hawai'i o 'Amelika mai ka pō mai a he po'e 'Inikini ka lāhui koko Hawai'i o 'Amelika. He kū'ē'ē loa kēia i ka 'oia'i'o a 'a'ohe wahi ho'oponopono 'ana o kēia i ka hihia helu 'ekahi ma waena o ke Aupuni Mō'ī a me 'Amelika Hui 'ia, 'o ia ho'i, he noho koa haki ku'ikahi ka noho 'ana o ko 'Amelika pū'ali koa ma Hawai'i nei a he haki kānāwai o nā 'āina like 'ole.

'O kekahi mea i 'oi a'e kona ho'ohuikau i ka lāhui, 'o ia ho'i, ho'olilo ka Pila Akaka i ka hihia ma waena o 'Amelika a me ke Aupuni Mō'ī he hihia pili i ke koko o ke kanaka, 'a'ole he hihia o 'elua aupuni kū'oko'a. Pēlā e ha'oha'o ai ka po'e o Hawai'i inā he koko Hawai'i ko kēlā me kēia. He hana ho'omokuāhana kēia i ka lāhui Hawai'i. 'A'ohe wahi pili o ka noho koa 'ana o ko 'Amelika pū'ali koa ma Hawai'i nei i ke koko—ua pili i ke kū'oko'a o kēlā me kēia 'āina. Na Nā Aupuni Hui 'ia nō e ho'omaopopo i ko 'Amelika e ho'okō i kona mau ku'ikahi me ke Aupuni Mō'ī.

E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:
» .(JavaScript must be enabled to view this email address)
» .(JavaScript must be enabled to view this email address)
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai'i at Mānoa, supported by the Initiative for Achieving Native Hawaiian Academic Excellence.