Synopsis: The International Court of Justice recommends acknowledging only certificates of birth, marriage and death in “;belligerent occupations.”;

'A'ole ka mo'olelo o ka noho koa 'ia 'ana o Hawai'i he mo'olelo kū ho'okahi wale nō. Ma ka nānā 'ana i ka mo'olelo o kekahi mau 'āina, ua like nō me ka mo'olelo o ka ho'ouka kaua 'ana mai o ko 'Amelika pū'ali koa i ka 'āina nei me ka noho koa pū me ka makemake 'ole e ho'i hou i ko lākou 'āina pono'ī nō. I ka MH 1940, ho'ouka ka pū'ali koa o ka USSR i nā 'āina kū'oko'a o ka Balatika, 'o ia ho'i, Estonia, Latvia, me Lithuania a noho koa pū ma ia mau 'āina me ka ho'okikina pū ho'i i nā kānāwai o ka USSR ma ia mau 'āina a hiki i ka 1991. Ha'alele pau loa ko ka USSR i ka 1994, a laila, lilo hou ka ho'oholo 'ia 'ana o nā aupuni Balatika iā lākou iho nō i ia makahiki nō.

I ka 1884, lilo ka 'āina i maopopo 'ia ma ka inoa 'o Namibia i kēia wā ma 'Apelika hema he panalā'au ma lalo o Kelemānia. Ma muli o ka hā'ule o Kelemānia ma ke Kaua Honua I i ka 1920, na nā Hoa Aupuni i lanakila ma ia kaua i kā'ili i nā panalā'au o Kelemānia a kēnā 'ia ke aupuni o 'Apelika Hema nāna e ho'oholo i ke aupuni o Namibia a hiki i ke kūkulu 'ia 'ana o kekahi aupuni pa'a nāna e ho'oholo i ia 'āina nona iho nō. Akā, ma hope o ke Kaua Honua II, ua ea mai ke aupuni ho'okae 'ili o 'Apelika Hema a ho'oholo pū 'ia nā hana aupuni o Namibia pēlā.

No ke kū'ē'ē ikaika o ka 'Aha Laulā o Nā Aupuni Hui 'ia i ka 1966 i ka ho'okō 'ana o 'Apelika Hema i kā lākou mau kānāwai ho'okae 'ili ma Namibia, wehe 'ia ke kēnā iā 'Apelika Hema, akā, hō'ole ia aupuni i ka ha'alele a ho'omaka lākou i ka noho koa kū'ē kānāwai ma Namibia.

I ka 1970, nīele ka 'Aha Ho'opalekana o Nā 'Āina Hui 'ia i ka 'Aha Ho'okolokolo Kaulike o nā 'Āina Like 'Ole ma Nekelana e ho'opuka i kekahi mana'o kōkua no ka hihia o 'Apelika Hema me Namibia. 'O ka mana'o i ho'opuka 'ia, 'o ia ho'i, 'o nā 'ano palapala wale nō e nānā 'ia ma waena o nā 'āina like 'ole i hana 'ia ma lalo o ka noho koa 'ana o 'Apelika Hema ma Namibia, 'o ia nā palapala hānau, male, a me ka make wale nō. 'A'ole e 'ae 'ia nā 'ano palapala like 'ole 'ē aku, e like me ka palapala 'alolio. 'O ke kumu mai, 'a'ohe kū o nā hana a 'Apelika Hema i nā kānāwai pili i nā 'āina like 'ole. Pēia pū nō ka hopena o nā hana a ko 'Amelika pū'ali koa i kū 'ole i nā kānāwai o nā 'āina like 'ole ma Hawai'i nei. Hō'ole 'o 'Apelika Hema i ka ha'alele iā Namibia a hiki i ka 1990, 'o ia ko lākou wā i waiho loa ai iā Namibia.

No laila, i mea e ho'opololei 'ia ai ka noho koa 'ana o ko 'Amelika ma ka pae'āina nei, he pono loa nō na ka pū'ali koa 'Amelika e ho'okō i nā kānāwai o ke Aupuni Mō'ī iā lākou nō e noho koa nei ma ka 'āina nei a hiki i ko lākou wā e ho'i loa ai i ko lākou 'āina makua. E like nō me ka waiho loa 'ana o ko ka USSR i nā 'āina Balatika a me ka waiho 'ana o 'Apelika Hema iā Namibia, pēia nō ka hana a ka pū'ali koa 'Amelika i ka pae'āina nei e pono ai.

E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:
» .(JavaScript must be enabled to view this email address)
» .(JavaScript must be enabled to view this email address)
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai'i at Mānoa, supported by the Initiative for Achieving Native Hawaiian Academic Excellence.