Synopsis: This is a story about the love and support that is freely given during times of sadness by the 'ohana Kaiapuni (Hawaiian Language Immersion Families). It is also a loving remembrance of a teacher for her student, his brother and their cousin. Continued from last week.

———

(Ho'omau 'ia)

I kona wā e hīmeni 'ole ana, kama'ilio pinepine 'o ia i kekahi mea nui iā ia. 'O ia ho'i nā moa. Wehewehe 'o ia no ke 'ano moa āna i mālama ai, no ka hānai 'ana i nā moa, a no ka hopu 'ana i nā moa. Ua hau'oli 'o ia i ka mālama 'ana i nā moa, a 'ike 'ia ka nui o kona hoihoi i ka 'imo'imo o kona maka ke wehewehe nō 'o ia i kāna mau moa.

'Oiai au e a'o ana iā Kalamaku, aia au e a'o ana i ka papa kaiapuni a Na'ilima i ha'alele ai no kahele 'ana i ke kula ki'eki'e 'o Kamehameha. Ua pili loa au i kēia papa, no ka mea, 'o ia nā haumāna papa 'elima i ko'u makahiki mua i a'o ai ma ke kula ki'eki'e 'o Kekaulike. He kumu au no 'elima makahiki ma mua o kēlā, akā, ma ke kula ha'aha'a na'e ia; no laila, ma ku'u na'au, 'o lākou ka papa a'u i pili pa'a ai. 'O ke kumu mai ho'i, 'o ko'u a'o 'ana iā lākou, a i ko'u 'ike 'ana i ko lākou ulu 'ana mai nā 'ōpio a i ke kūlana makua, me he mea lā, aia au e ulu pū ana me lākou ma ke ‘ano he kumu. Ua lohe au i mo'olelo e pili ana iā Na'ilima i kekahi manawa, akā 'a'ole au i 'ike i ka hohonu a me ke ākea o ke aloha a me ka pilina ma waena o ku'u papa a me Na'ilima.

He pilina pa'a ke aloha no nā kau a kau. 'A'ohe 'ino nāna e uhae.

I kēia mau lā, aia au ma ke kula kaiapuni 'o Nānākuli, no ka mea, ua ho'i au i ke kula nui i mea e ho'opau ai i ka'u kekelē Lae 'Ula mai ke kula ho'ona'auao mai o ke Kulanui o Mānoa. Ua ku'i ka lono o kēia ulia, a 'o ke kelepona akula nō ia i kekahi o ku'u mau haumāna mai ku'u papa punahele, ka papa ho'i, i pili me Na'ilimakuwai'oleikekulamehamehaokaluna'iu'iuokeahua. 'O ku'u mana'o nui i hā'awi aku ai iā lākou, 'o ia ho'i, aia ku'u mana'o, ku'u aloha a me nā pule me lākou a pau ma ia manawa kūmākena a weliweli ho'i.

'O Lei Ishikawa kekahi o ia mau haumāna a'u i kama'ilio mua ai. Nāna i kelepona mai ia'u e wehewehe no ka hala akula o Kalamaku. Ua mā'e'ele kēlā i ka hali'a aloha i kona hoa pili 'o Na'ilima.

“No ke aha ka'a kēia pō'ino iā lākou? He aha ka mana'o o kēia?” i ha'uha'u uē ai 'o ia.

“He ha'awina kēlā no kākou e nalu ho'okahi iho ai nō, i mea e huli ai i kā kākou pane pono'ī. 'A'ole e like ana nā pane a kākou a pau, e Lei,” i pane akula au iā ia. “Maopopo iā ‘oe e Lei, he kuleana ko kākou a pau ma kēia ola, a 'o ko lākou kuleana—”

“Ua kō,” wahi a Lei.

“'Ae. Ua kō nō.”

He pilina pa'a ke aloha no nā kau a kau. 'A'ohe 'ino nāna e uhae.

('A'ole i pau.)

———

E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

» .(JavaScript must be enabled to view this email address)

» .(JavaScript must be enabled to view this email address)

a i ‘ole ia, ma ke kelepona:

» 956-2627 (Laiana)

» 956-2624 (Kekeha)

This column is coordinated by the Hawaiian Language Department at the University of Hawai'i at Mānoa, supported by the Initiative for Achieving Native Hawaiian Academic Excellence.