Synopsis: Another of our beloved kupuna has recently passed on. Mālia Craver was a frequent guest on the Hawaiian language radio program Ka Leo Hawaii and was active in all aspects of the movement to revitalize the Hawaiian language and culture. The following tribute was sent in to Kauakukalahale by her longtime friend, Larry Kauanoe Kimura.
—

E ka Uakūkalahale ē,

He wahi ho'omana'o kēia i kīpona 'ia me nā hali'a aloha no ku'u hoaaloha maika'i 'o Mālia Craver e moe maluhia mai nei kona mau kau a ho'oilo. I ia wā o nā makahiki mua o nā 'umikūmāiwa kanahiku i 'ōlelo 'ia ai 'o ka ho'omaka 'ana ia o ke ala hou 'ana mai o nā mea e pili ana i nā mēheuheu Hawai'i, 'o ia ko māua kama'āina mua 'ana kekahi i kekahi. Ua hele a kama'āina kona leo ma ka papahana lēkiō 'o Ka Leo Hawai'i a ua lilo ka home o lāua me kāna kāne 'o Bill Craver ma Mānoa he hale ho'okipa iā mākou me nā hoa ho'opuka papahana 'o Ka Leo Hawai'i. 'O ke aloha 'ōlelo Hawai'i a me ke aloha no ka 'āina nei nā mea i awaiaulu 'ia ai ia noho hoaaloha 'ana no kēia mau makahiki lōkihi.

Ku'u Hoa O Ke Alo Pali

He 'ū he aloha no ku'u hoa
O nā lā kilihune a ka Tuahine
I ka nū nihi hele nei
Maika'i nō i ke alo pali
Pali ke aloha kau i ka ni'o
Hi'ilani 'ia e ke ao 'ōpua
Ho'opua nanahe mai ana
E noho nō i ka pūweuweu
'O ku'u hoa 'alo leo ia
O ka hale pili mahamaha
Mahana loko i ka leo Hawai'i
Ke aho e 'īnana ai nā pua
Puana a'e me ka lanakila
E mau ka 'ōlelo o ka 'āina
No ka 'āina ke aloha
He make'e pūlama loa 'ia
Kau ke aloha nou e ke hoa
Ka hoaka haili 'ana mai
He ao ua i ka pali 'o Pu'uloa
Ka nene'e i ke kula o nā Kekaha
Kaha nā hali'a i nā lā u'i
Nā hana la'ela'e a ka mahina
I laila e ke hoa ko hi'olani lā
A kau ke keha i ka uluna nei
Ulu mai ka 'ū he aloha
Nou e Mālia Craver
Ku'u hoa o ke alo pali
Na Larry Kauanoe Kimura
11 'Okakopa 2009

E nā makamaka heluhelu o ka ‘ōlelo Hawai'i, ke hā'awi pū aku nei nā keiki kaomi pihi o Kauakūkalahale i ko mākou aloha nui iā Mālia Craver a pēia pū me kona 'ohana a me nā makamaka hoaaloha ho'i e noho ho'omanawanui nei i ka 'eha welenia o ke kaumaha no ka hala 'ana o ke hoa. A he mea kona hala 'ana e kaumaha ai ka lāhui Hawai'i holo'oko'a, no ka mea, ma kona hala 'ana, hala pū nō me ka wā i lohe 'ia ai ke 'ano nahenahe o ka leo Hawai'i i 'ike 'ia ai ka mānaleo he kanaka i hānai 'ia mai i kāna 'ōlelo mai ka waha mai o kona mau mākua a kūpuna paha. Aloha nō ia mau lā, ua hala. A 'ehia mea aloha o kākou, ka po'e e 'imi nei i kumu ho'ohālike e ho'oilipili ai. Ke kāka'ikahi wale nei nō, a 'o Mālia Craver kekahi o nā mea hope loa. LH.

—

E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:
» .(JavaScript must be enabled to view this email address)
» .(JavaScript must be enabled to view this email address)
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai'i at Mānoa, supported by the Initiative for Achieving Native Hawaiian Academic Excellence.