Synopsis: Support for the university depends on its accountability to the community and the benefit it provides. Is it worthy?

———

Aloha hou mai kākou e nā hoa heluhelu o ka 'ōlelo kanaka. Eia mai kā 'oukou wahi mea kākau ke pane'e aku nei i kahi mana'o no kākou a pau e no'ono'o ai. He wā wī kēia e uluhua ai ka mana'o i ka no'ono'o mau i ka ho'omakauli'i. Penei ho'i: Ua 'ike 'ia e ka po'e kahiko o Hawai'i nei ka hopena o ke pī. He mo'olelo kaulana nō ia i kākau 'ia nō ho'i i loko o nā nūpepa 'ōlelo Hawai'i o ke au i hala. 'O ia ho'i, ma ka hiki 'ana o ka huaka'i o kekahi mau malihini i Kahana, ua noi lāua i nā kama'āina o ia wahi i wai a i mea'ai. 'O ka mea e noho ana ma uka, ma kahi hu'ihu'i o ka wai, ua hō'ole 'o ia. 'A'ohe wai. 'O ka mea na'e e noho ana ma kai aku, ma kahi ho'i o ka wai hapa kai, ua 'olu'olu kona na'au a ua hā'awi manawale'a aku i ka wai i loa'a. Ma ia hope koke aku, ua lilo ka wai a ke kanaka pī e noho ana ma uka he wai 'awa'awa, a ua lilo nō ho'i ka wai a ke kanaka lokomaika'i i wai hu'ihu'i. A 'o ia ihola ka hopena o ke pī i ke au kahiko.

I ha'awina maika'i nō kēia no kahi pelekikena hou o ke Kulanui o Hawai'i e mālamalama ai. I ka wā i hō'ole ai nā polopeka i ka 'aelike a ke Kulanui i hāpai ai, 'o kona pono hō'āhewa koke nō ia i nā polopeka i ka 'ānunu a me ke aloha 'ole i nā haumāna. Aia nō paha kekahi mau polopeka me kēlā ke 'ano. 'A'ole na'e e hihi. He nīnau kēia no ka pono o ke Kulanui. 'O ka mea ‘āpiki, 'akahi nō ua pelekikena nei a hiki mai i Hawai'i. He nui kona uku, ma kahi o ka $400,000 a 'oi, a eia 'o ia ke ho'ohalahala nei i ka po'e i pa'u nui i ka ho'oikaika 'ana i ke Kulanui ‘oiai 'o ia ala e noho ana ma Loko. I mea makepono aha 'o ia e pono ai ko kākou Kulanui? He makehewa ka 'imi 'ana ma waho o Hawai'i i mau luna no ke Kulanui. 'O ia na'e ka mea ma'a mau. He nui ka uku e ho'owalewale ai iā lākou e hele mai. Auē! 'A'ohe o lākou 'ike i ke 'ano o ka po'e kūloko. 'A'ohe wahi 'ike no ka hopena o ke pī. Eia ka mea minamina. Aia ka 'ulu i ke alo, a 'o kona hala nō ia!

Ua hai 'ia kekahi luna no ka mālama 'ana i nā hale kula, nā hale ha'uki, nā pā a pēlā aku. I kēlā mahina aku nei, ua loli ke kulekele a ua kipaku 'ia kekahi po'e pā'ani pōhīna'i mai ka hale ha'uki aku no ka loa'a 'ole he palapala haumāna. Ua hai 'ia kekahi kanaka no ka noho kia'i 'ana i ka puka. Ua hakahaka wale nō na'e ia hale. 'A'ohe kanaka o loko! Ke lele kapuahi wale nei nō ia kālā. 'A'ohe wahi 'ano o ka ho'omakauli'i.

I kēia wā e ho'ohalahala 'ia nei nā polopeka i ka 'ānunu, ke ho'omāunauna 'ia nei ke kālā a ke hulikua 'ia nei ka po'e o ke kaiaulu. He wā kēia e hō'ike ai i ka lokomaika'i i ka lehulehu i kāko'o mai ka lehuehu i ke Kulanui. I mana'o 'ia auane'i ke Kulanui he wahi ho'omāunauna kālā, a he wahi kapu, 'a'ole 'ae 'ia ka lehulehu e komo, e mana'o ana ka 'aha'ōlelo he makehewa ke kāko'o 'ana i ke Kulanui. E ao kākou o 'ike maka 'i'o 'ia auane'i i kēia au ka hopena o ke pī!

———

E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:
» .(JavaScript must be enabled to view this email address)
» .(JavaScript must be enabled to view this email address)
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai'i at Mānoa, supported by the Initiative for Achieving Native Hawaiian Academic Excellence.