Synopsis: Were any of the people currently passing judgement against Coach McMackin involved in denigrating the UH football team for being called Rainbows?

———

Aloha hou mai nō kākou e o'u makamaka heluhelu o Kauakūkalahale. I kēlā pule aku nei, ho'oku'u hewa akula kahi Greg McMackin, ke ka'i pōpeku o ke Kulanui o Hawai'i ma Mānoa, i ka hua'ōlelo “faggot” mai kona waha aku. 'Oiai, ua puka ua hua'ōlelo kūamuamu lā i mua o nā pahu pa'i wikiō o ka po'e kūkala nūhou, 'a'ole nō a he wā, laha akula ia hana mai 'ō a 'ō o ka 'āina a pi'i ka inaina o ka lehulehu. Me ka hākālia 'ole iho, kani mai nā leo ho'ohalahala e koikoi ana i ka ho'opa'i 'ia o ua ka'i nei ma ke kālā a ma ke kīpaku 'ia paha mai ka hana aku.

Ua maopopo ke 'ano o ia hua'ōlelo he mea kūamuamu e 'eha ai ka na'au. A he mea ho'oha'aha'a ho'i i ke kūlana o nā māhū a me ka po'e moe aikāne. A ua maopopo nō ho'i ke 'ano o ia mea he 'ōlelo ē he mana kona e ola ai a e make ai paha. Pehea lā ka mana'o o ua 'o McMackin i kona wā i ho'opuka ai i ia 'ōlelo? He mana'o hō'ino paha, 'a'ole paha? No'u iho, 'a'ohe o'u 'ike i ka mana'o i loko o ka na'au o ha'i, a no laila, 'a'ole hiki ia'u ke hō'āhewa iā ia i ka mana'o hō'ino. 'O wai lā ke kanaka i 'ike i ka mana'o o ha'i? 'Eā, na ka mea hewa 'ole ka hailuku.

Ua ho'omaopopo ua 'o McMackin i kona hewa a puka koke akula kāna mihi i mua o ke ākea. Wahi a kāna 'ōlelo, he hana kūpono 'ole nō ia, akā, 'a'ohe ona no'ono'o i ka hō'ino i nā keiki pā'ani pōpeku o Notre Dame a me ka po'e moe aikāne. He mihi maoli paha, 'a'ole paha, 'o ia ala wale nō ka mea 'ike i ka ha'ina.

Eia mai nō ka'u nīnau i ka po'e hō'āhewa. 'O wai ka mea ma waena o 'oukou i ho'opuka 'ole aku i ia hua'ōlelo ma mua? No 'oukou anei ia kuleana? Ho'omaopopo a'ela au i ka hihia i kupu mai i ka wā iā June Jones. Nui ka po'e o 'Amelika a puni e ho'ohenehene ana i nā keiki pōpeku o UH he hoalike ia no ka po'e māhū a me ka po'e moe aikāne ma muli o ka inoa kapakapa o ke kime pōpeku, 'o ia ho'i, 'o Rainbows. Ua koho 'ia a'e nei ka rainbow (ke ānuenue) i hō'ailona no ka po'e māhū a me ka po'e moe aikāne. He mana'o haole na'e kēlā.

Eia ka mea 'āpiki. He mea nui ke ānuenue no ka po'e Hawai'i, mai ka wā kahiko mai, a no ka mea, he hō'ailona ia no ka hānau mai o kekahi ali'i ki'eki'e o ke kūlana. Eia na'e, 'a'ohe luna o ke kulanui a o ka moku'āina paha i noi'i a i kāko'o i ka mana'o Hawai'i o ke ānuenue. 'A'ole nānā 'ia nā mana'o Hawai'i. He mea 'ole ia. 'O ka mana'o haole ka mea nui. 'O ka hilahila i ka ho'ohenehene 'ia mai, ho'ololi 'ia ka inoa o ke kime. Eia ke kapa 'ia nei ka inoa hou 'o nā Warriors. He hana kohu 'ole ke kūamuamu wale aku iā ha'i a he hana 'ino na'e ka huli kua 'ana i nā mana'o Hawai'i. 'Ehia mea aloha o nā mea Hawai'i?

———

E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

» .(JavaScript must be enabled to view this email address)

» .(JavaScript must be enabled to view this email address)

a i ‘ole ia, ma ke kelepona:

» 956-2627 (Laiana)

» 956-2624 (Kekeha)

This column is coordinated by the Hawaiian Language Department at the University of Hawai'i at Mānoa, supported by the Initiative for Achieving Native Hawaiian Academic Excellence.