Synopsis: Aunty Agnes Kalanihookaha Cope will receive an Honorary Doctor of Humane Letters degree at the UH-Mānoa commencement today.

———

Aloha mai nō kākou e nā hoa makamaka heluhelu o Kauakūkalahale. E kala loa ko kākou hālāwai 'ana. Mahalo i kahi luna ho'oponopono hou, iā Keao NeSmith, i ke kākau 'ana i nā mo'olelo hoihoi o nā pule i hala aku nei.

E waiho na'e kākou i ia mau mo'olelo no ka manawa, a e huli aku ka nānā 'ana i kekahi kumuhana hou. Eia a'e ka pau 'ana o ke kau kulanui (Kau Kupulau 2009) i ka pau 'ana o kēia pule, a i ka lā nō e puka ai kēia kolamu, e puka pū mai nō me nā haumāna laeo'o, he 24 ka heluna, o kahi polokalamu ho'omākaukau kumu i kapa 'ia 'o Ho'okulāiwi. He wā kēia no ua mau haumāna lā a me ko lākou mau 'ohana e 'oli'oli ai. He 'elua makahiki o ko lākou ho'omanawanui 'ana i nā ha'awina a ua ho'okō 'ia nā koina a pau. Eia hou, ua ho'oikaika nō lākou i ke a'o i nā keiki ma kauwahi kula aupuni me ka loa'a 'ole he wahi kenikeni uku!

Eia mai ho'i kekahi nūhou ho'ohau'oli, 'o ia ho'i, i ka puka 'ana o ua mau haumāna Ho'okulāiwi lā me ke kekelē laeo'o a me ka palapala e 'āpono ana i ko lākou a'o 'ana ma nā kula aupuni (me ka uku), e puka pū ana 'o Agnes Kalanihookaha Cope, he kupuna i aloha nui 'ia no kona paio mau 'ana no ka pono o nā haumāna o nā kula o Wai'anae mā lāua me Nānākuli. E puka ana nō 'o ia me ke kekelē lae'ula, he mea e hā'awi kāka'ikahi wale 'ia nō i nā kānaka o ke kaiaulu i like ka waiwai o kā lākou mau hana me ko ka hana a nā lae'ula o ke kulanui.

He nui ho'i nā papahana a Aunty Aggie i lawelawe a alaka'i ai. He kumu hula 'o ia i a'o 'ia e ke kumu hula kaulana 'o Lokalia Montgomery.  i ka ho'omaha loa 'ana o ke kumu hula Montgomery, ho'oili maila 'o ia i kona mau 'ike ma luna o Aunty Aggie, a na Aunty Aggie ia 'ike i ho'omau aku ma ke a'o 'ana i kāna mau haumāna pono'ī. He kumu kula nō ho'i 'o ia ma Wai'anae. Ua a'o i ka 'ōlelo Pelekania a me ka pāheona (art). Ua helu 'ia nō ho'i ma waena o nā hulu kupuna (living treasures) o Hawai'i nei no ka nui o kona paio 'ana no ka pono o nā Kānaka Maoli.

He mau papahana kāna i lawelawe ai no ka paipai a me ka ho'omohala 'ana i nā hana no'eau a me nā loina Hawai'i, a no ka ho'oikaika 'ana ho'i i ke olakino o nā Kānaka Maoli ma ka Wai'anae Community Health Center. A 'o ka mea paha i 'oi a'e, 'o ia kona ho'oikaika luhi 'ole 'ana i ka ho'oponopono i nā pilikia o nā kula aupuni e kū ana ma nā kaiaulu Hawai'i. Ua 'ikea ka hemahema o ke a'o i pilikia mau ai ka po'e Hawai'i a holopono 'ole ko kākou 'imi 'ana i ka na'auao.

I mea e hō'ike ai i ko lākou mahalo nui i kāna mau hana, ua kākau 'ia kekahi mau leka e ho'ohanohano ana iā ia. Na Kenekoa Clayton Hee o ka Moku'āina kekahi a na Kenekoa Daniel Akaka o 'Amelika Hui Pū 'Ia kekahi. Aia ma kēia hope aku nei, e kapa 'ia kona inoa kūlana hou 'o Dr. Aunty Aggie!

———

E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

» .(JavaScript must be enabled to view this email address)

» .(JavaScript must be enabled to view this email address)

a i ‘ole ia, ma ke kelepona:

» 956-2627 (Laiana)

» 956-2624 (Kekeha)

This column is coordinated by the Hawaiian Language Department at the University of Hawai'i at Mānoa, supported by the Initiative for Achieving Native Hawaiian Academic Excellence.