Ma mua o ka MH 1887, 'o ka Hale Hō'ike'ike Aupuni kahi i mālama a hō'ike'ike 'ia ai nā mea makamae a me nā palapala kūkulu o ke Aupuni Mō'ī. I ia wā, aia kēia hale ma ka papahele 'elua o Ali'iōlani Hale ma ke Alanui Mō'ī. Akā, i kēlā makahiki nō, ua pani 'ia ka Hale Hō'ike'ike Aupuni e ka 'Aha Kuhina ma lalo o Lorrin Thurston. He ho'omākaukau kēia hana no ka ho'okahuli 'ia 'ana o ke Aupuni Mō'ī ‘oiai ‘o Thurston kekahi o ka pū'ulu nāna i ho'okikina i ke Kumukānāwai 'Ēlau ma luna o Kalākaua i ka 1887 a he hoa ho'okahuli aupuni nō 'o ia i ka 1893.

I ka MH 1889, kūkulu 'o Charles Reed Bishop i ka Hale Hō'ike'ike 'o Bīhopa ma Kalihi no ka mālama i nā palapala a me nā mea makamae o ka 'ohana o kāna wahine, 'o Bernice Pauahi. I ka 1890, hā'awi 'ia nā mea i waiho 'ia ma ka Hale Hō'ike'ike Aupuni iā Bishop e mālama ai “no ka manawa wale nō.”

Ma hope o ka ho'okahuli 'ia 'ana o ke Aupuni Mō'ī i ka 1893, ua puehu li'ili'i nā mea makamae he nui o ke aupuni a puni ke ao. Ua loa'a hou kekahi o ia mau mea mai ia manawa mai a mana'o 'ia ua nalowale kekahi mau mea.

I ka lā 'eono o 'Apelila nei, ua mālama 'ia he 'aha kūkālā ma Nūioka e kūkālā aku ai i kekahi o nā palapala o ke Aupuni Mō'ī i puehu mua. 'O kekahi kupa o Kaua'i kekahi i hele a ma ka 'ā'ume'ume kūkālā hahana 'ana, lilo iā ia nā palapala ma lalo nei:

1. He kope o ke Kumukānāwai o ke Aupuni Mō'ī Hawai'i o ka MH 1840 ma ka 'ōlelo Hawai'i.

2. He kope o ke Kumukānāwai o ke Aupuni Mō'ī Hawai'i o ka MH 1840 i unuhi 'ia ma ka 'ōlelo Pelekānia.

3. He kope o ke Kumukānāwai a me nā lula ho'omalu o ka Hale Nauā i pūlima 'ia e ka Mō'ī Wahine Lili'uokalani.

4. He kope o Nā Mele 'Aimoku a ka Mō'ī Kalākaua i pūlima 'ia e Curtis Iaukea.

5. He kuahaua na Lili'uokalani i kuahaua 'ia ho'okahi lā ma mua o ka ho'okahuli 'ia 'ana o ke Aupuni Mō'ī.

Ua 'i'ini ka mea nāna ua mau palapala nei e ho'iho'i 'ia mai ua mau mea nei i Hawai'i nei e nānā a ho'opa'a ai ka lehulehu. 'Ōlelo ka mea nāna kēia mau palapala, 'o ka mea nui loa iā ia, 'o ia ka pa'a o ua mau mea nei i ka 'āina makua nei a i nānā 'ia ma ke 'ano he mau mea makamae o ka mo'olelo o ko Hawai'i Pae'āina.

'O ka ho'i mai nei nō ia o ua mau palapala nei i ka pae'āina nei a ke mālama 'ia ala i loko o kekahi pahu mālama palekana ma kekahi panakō ma Honolulu nei. I kēia pule, nui ka po'e akamai i ka hana mālama palapala kahiko e nānā nei i ke kūlana pono o ia mau palapala a ke ho'oholo 'ia ala nō ho'i ke kumu kū'ai o ia mau mea.

Na Kauakūkalahale e ho'olaha i kahi a me ka hana e hiki ai i ka lehulehu ke nānā. No laila, e nānā hou mai.