Synopsis: As the highest ranking U.S. official in the Kingdom and Commander of the U.S. Pacific Command, Adm. Timothy Keating’s job is to administer the laws of occupation in the Hawaiian Islands.

E like nō me ka ho'okō 'ia 'ana o nā kānāwai noho koa e nā pū'ali koa o 'Amelika ma Iraq me Afghanistan, pēia nō ka hana a ko 'Amelika pū'ali koa ma ka noho koa 'ana ma ka pae'āina nei e pono ai. Ua like pū ke kūlana o ua mau 'āina nei i noho koa 'ia, no laila, kūpono nō e like ka ho'omalu 'ia 'ana o ia mau aupuni. Na ka mana noho koa e ho'okō i nā kānāwai kūloko o ke aupuni i noho koa 'ia e pono ai e like me nā hō'ike o Hague me Geneva a me ka U.S. Army Field Manual 27-10.

'O 'Akimalala Timothy Keating ke 'Alihikaua o nā pū'ali koa 'Amelika ma ka Pākīpika a 'o ia ho'i ka luna aupuni ki'eki'e loa o ke kūlana o 'Amelika ma ke Aupuni Mō'ī nei. No laila, nāna e ho'okō i nā kānāwai ho'opa'i kalaima a kīwila ho'i o ke Aupuni Mō'ī ma ka pae'āina nei. Inā pēlā, he mea 'ole ka Moku'āina 'o Hawai'i a 'a'ohe wahi hana a Kia'āina Lingle a me ka 'Aha'ōlelo o ka Moku'āina. Na Keating e ho'okō i nā kānāwai o ke Aupuni Mō'ī a ho'omākaukau ho'i no ka ho'iho'i hou 'ana i nā mana a pau i ke aupuni o ke Aupuni Mō'ī i hiki ke mālama 'ia ke koho pāloka 'ana ma waena o nā kupa o ke Aupuni Mō'ī a ho'opiha hou 'ia nā kūlana hana aupuni.

He kuleana pili 'oihana a pilikino ho'i ko Keating ma ka ho'okō 'ana i kāna hana, no laila, inā 'a'e 'o ia i nā kānāwai noho koa, hiki ke hō'āhewa 'ia 'o ia i ka hana kalaima kaua a he hewa pili 'oihana a pilikino nō ia nona a pēia pū nā luna koa like 'ole pākahi i 'a'e i nā kānāwai noho koa.

Nui nā hana hewa a ko 'Amelika pū'ali koa mai ka wā i hiki mai ai lākou i ka pae'āina nei a hiki i kēia wā e like me ka waiho 'ana i nā pōkā pahūpahū a me nā lā'au kemikala 'ino like 'ole ma kēia 'āina a me ke kai a me ka 'a'e 'ana i nā kānāwai noho koa. He nīnau kēia i pili i nā kānāwai kau ma luna o nā 'āina like 'ole a 'a'ole ho'i kēia he nīnau e ho'oponopono 'ia ma nā 'oihana kālai'āina kūloko.

Ma muli nō o ke kūlana kahiko loa o nā kānāwai o ke Aupuni Mō'ī, he pono loa nō he wā ho'oponopono kānāwai i hiki ke hana 'ia nā kānāwai pili i ka nohona o kēia wā nei, no laila, 'o ka hana kōkua a Keating, 'o ia ka ho'omalu 'ana i ke aupuni ma kona 'ao'ao he 'Alihikaua noho koa a hana i nā kānāwai kū no ka manawa wale nō i kūpono no ka lāhui kanaka o kēia wā. Aia a pa'a pono hou ke aupuni o ke Aupuni Mō'ī, hiki nō i ka 'Aha'ōlelo ke koho e ho'ohui i ia mau kānāwai kū i ka manawa i loko o nā kānāwai pa'a o ke Aupuni Mō'ī a i 'ole e hana i nā kānāwai hou loa. A laila, 'o ka pau maila nō ia o ka noho koa 'ana a pau pū ka hana a ke 'Alihikaua noho koa ma ka pae'āina nei.

E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

» .(JavaScript must be enabled to view this email address)
» .(JavaScript must be enabled to view this email address)

a i ‘ole ia, ma ke kelepona:
» 956-2627 (Laiana)
» 956-2624 (Kekeha)

This column is coordinated by the Hawaiian Language Department at the University of Hawai'i at Mānoa, supported by the Initiative for Achieving Native Hawaiian Academic Excellence.