Synopsis: Cooley, president of the American Bar Association in 1893 and considered the highest authority on constitutional law, wrote, “Grave Obstacles to Hawaiian Annexation,” arguing that the U.S. claim over Hawai'i is dubious.

Ma Iune o ka MH 1893, 'elima mahina ma hope o ka ho'okahuli 'ana o ka pū'ulu ho'okahuli i ke Aupuni Mō'ī Hawai'i, nānā akula 'o Thomas Cooley i nā hana a ke Aupuni Kūikawā, nā koa 'Amelika i kōkua i ka ho'okahuli 'ana, a me ke Kuhina 'Amelika, 'o John Stevens, ka mea nāna i kāko'o koke i ke Aupuni Kūikawā me ka ho'ohiki aku i ka pale 'ana o 'Amelika. Eia kekahi mau mana'o o kāna hō'ike:

'O ke 'ano maoli o ia mea he aupuni kūikawā, he mea ia e kūkulu 'ia no ka mālama 'ana i ka malu i ka wā pī'ō'ō o ke aupuni a hiki i ka pa'a hou 'ana o ka malu, akā, ua malu ke Aupuni Mō'ī i ia manawa a 'a'ohe pī'ō'ō. 'O ka hana pololei a ke aupuni kūikawā, 'o ia ka ho'omau 'ana i ka pili o ke aupuni me nā hoa aupuni o ka honua a kaupalena 'ia kona mana no ka ho'okō wale 'ana nō i nā mea e pono loa ai ke aupuni.

'O ka hā'awi 'ana i ka pae'āina nei iā 'Amelika ke kumu ho'okahi o ke kūkulu 'ia 'ana o ke Aupuni Kūikawā o ka 1893, no laila, he mea nō kēia e kū'ē'ē ai i ke kumu o ke kūkulu 'ana i kekahi aupuni kūikawā. He mea kēia Aupuni Kūikawā e ku'ihē ai ka hilina'i. He pono nō ke aupuni e hā'awi 'ia ai ke aupuni e hopohopo i ka 'ae 'ana ma muli o ke kumu no ka hā'awi 'ana a 'a'ole i wehewehe 'ia e ke Aupuni Kūikawā mai hea mai ko lākou mana e hā'awi ai i ka pae'āina nei.

'O ka hō'ike a nā luna o ke Aupuni Kūikawā, no lākou wale nō ia mau mana'o. 'A'ole i nīele 'ia nā kupa o ke Aupuni Mō'ī ko lākou mau mana'o. He kupa ka po'e ho'okahuli o ka 'āina 'ē a ua ho'ā'o koke lākou e hā'awi aku i ka pae'āina i kekahi aupuni 'ē. 'O ka hana pololei a kekahi aupuni kūikawā, 'o ia ka mālama i ka pono o ke aupuni.

Ua 'eleu 'o Stevens i ka ho'ohiki aku i ka pale 'ana o 'Amelika i ke Aupuni Kūikawā. He aha ke kumu no ka pale 'ana inā 'a'ohe aupuni e kaua ana me Hawai'i i ia wā? Eia hou, 'a'ole 'o ia i 'ae 'ia e Pelekikena Harrison e hana pēlā. I ka wā i ho'omaopopo 'ia ai 'o Pelekikena Harrison, kū'ē ikaika 'o ia a kauoha a'ela e ho'iho'i hou 'ia ke Aupuni Mō'ī. 'A'ohe ho'olohe o Stevens a hāpai 'o ia i ka hae 'Amelika ma luna o nā hale aupuni o Honolulu nei.

He aupuni kū'oko'a ke Aupuni Mō'ī Hawai'i a he hoa o ka 'ohana aupuni o ka honua a like pū kona kūlana me nā aupuni 'ē a'e ma ke kānāwai. Inā hui pū 'elua aupuni, hana 'ia ma ke ku'ikahi.

'A'ohe mana o ke Aupuni Kūikawā a 'a'ohe ku'ikahi me ka Lepupalika 'o Hawai'i, ke Kelikoli 'o Hawai'i, a i 'ole ka Moku'āina 'o Hawai'i.

'O ka mea i hewa i kinohi, 'a'ole e lilo he pololei i ke au o ka manawa.

E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

» .(JavaScript must be enabled to view this email address)
» .(JavaScript must be enabled to view this email address)

a i ‘ole ia, ma ke kelepona:
» 956-2627 (Laiana)
» 956-2624 (Kekeha)

This column is coordinated by the Hawaiian Language Department at the University of Hawai'i at Mānoa, supported by the Initiative for Achieving Native Hawaiian Academic Excellence.