'Auhea 'oukou e nā hoa heluhelu o Kauakūkalahale e ho'omanawanui nei i ka nui o ka ua e loku pinepine nei i ka pō a me ke ao o ka Ho'oilo. 'O ka nui o ka ua, komo ka ukiuki o kekahi po'e a lohe 'ia mai ka leo i ka 'ōhumuhumu no ka hemahema o ka noho pulu 'elo 'ana o ka 'āina.

  Nui nā pilikia e kupu mai i ka wā ua, a inā he ua nui, he oki loa i ka ma'ū wale! Hālanalana ka wai ma nā 'āina malo'o a ma'a 'ole ho'i i ka wai nui. Kahe wale aku ka wai 'ula i ke kai a pa'a nā ko'a i ka lepo. Pelekunu mai 'o loko o ka hale a uluāhewa 'ia nā paia i ke kūkaeloli. Hele a punahelu nā lole a 'a'ohe wahi 'ano o ka malo'o i ke kaula'i. Pakika a pahe'e nā alanui a mālualua ho'i, a lilo ia i mea e hemahema ai ke kalaiwa 'ana. Ho'oku'i aku a ho'oku'i mai nā ka'a, he mano a lehu nā ulia o ke alanui. A i kekahi manawa, hele a kūlanalana nā pōhaku nui o uka a kaka'a mai i ka pali, he pō'ino kō ā kai. 'O kākou kānaka nō ho'i kekahi, ke pulupē ka 'ili, loa'a auane'i i ke anu.

  Aloha kā ho'i kahi po'e kūlola 'o kākou! He mahalo 'ole i ka ua. Ua 'ōlelo 'ia e kahiko, “Uē ka lani, ola ka honua.” Ma ia 'ōlelo e 'ike 'ia ai ka mana'o pa'a o nā kūpuna no ka ua. He ola ho'i ko laila. He mea maopopo ka mole kumu o ka hua'ōlelo “waiwai”, 'o ia ka hua'ōlelo “wai”. A he mea nui ko'iko'i ka wai, no ka mea, pēlā e uliuli ai ka 'āina a lupalupa mai ho'i nā meakanu, a 'o ia ihola ka mea e ola ai ka honua a ola pū mai nō me kākou kānaka. I ka mao 'ana a'e o ka ua a nalo loa nā ao ua o ka lewa, he wā wī ke hiki mai a he pilikia a lohe mai ke a'o. 'O ka make wai ka hopena o ka wā wī a lilo ai kauwahi pilikia i helu 'ia maila ma luna i mea 'ole.

  He mau makahiki aku nei, launa akula māua me kekahi wahine 'ōiwi 'Amelika 'oiai 'o ia ma Hawai'i nei no kekahi 'aha kūkā. 'O ka po'e Cochiti o Pueblo, Arizona kona lāhui. Iā māua i ke kūkahekahe 'ana, ho'omaka ka helele'i mai o ka ua. I ia manawa nō, ho'omaka akula ko'u ho'olale 'ana iā ia e 'eleu aku māua a kahi malu - i 'ole e pulu i ka ua. 'O ko'u ho'omaka akula nō ia e hō'eleu aku a i huli mai na'e ka hana e nānā ai i ka pono a me ka 'ole o ku'u malihini, he mālie wale nō kā ka hele! Eia ke pulu nei kona lole, 'a'ohe ona nānā. I kona 'ike mai i ka piha ha'oha'o o ko'u helehelena no kona noke 'ana i ka hele mālie, 'ōlelo maila kēlā, “Where I’m from, we do not run from the rain.”

  I lawa nō a puka mai ia mau hua'ōlelo, ho'omaopopo a'ela au i ke 'ano o kona 'āina i hele mai ai, he 'āina malo'o. He mea mahalo nui 'ia ka ua. Wahi a kāna 'ōlelo wehewehe, inā e holo lākou mai ka ua aku, mali'a o pau kona ho'i mai i ka 'āina a 'o ka ho'omanawanui i ka wā wī ka ha'awina. No'ono'o ihola au i loko o'u i ke akamai o ia mana'o. Mali'a paha 'o ia mana'o ho'okahi nō ka mana'o o ko kākou mau kūpuna i ka 'ōlelo 'ana no ke ola o ka honua i ka ua.