Aloha mai kākou e nā hoa makamaka o ka 'ōlelo Hawai'i. Ua lohea nō paha ka mo'olelo o kahi Rod Blagojevich, ke Kia'āina o ka Moku'āina 'o Illinois i hō'āhewa 'ia no ka hana kohu 'ole 'o ka ho'ā'o 'ana e kū'ai aku i kona mana ho'okohu kenekoa hou ma hope o ka ha'alele 'ana o Barak Obama i kona kūlana Kenekoa o Illinois. Ua ha'alele 'o ia i ia kūlana ma hope o kona koho 'ia i Pelekikena no 'Amelika Hui Pū 'Ia. Ua 'oki leo 'ia ua hana kohu 'ole lā a pēlā i loa'a ai ua 'o Blagojevich ma ka 'umi'umi.

Ua hopu 'ia a hō'āhewa 'ia i ka hana 'apake'e politika, a ma hope o ka uku 'ana i ka pela, ua ho'oku'u 'ia a eia nō ke kali nei 'o ka ho'okolokolo 'ia o ia hihia. 'O ka mea 'āpiki, he oia mau nō kona lawelawe 'ana i nā kuleana like 'ole o ke Kia'āina a pau pū me ke koho 'ana i panihakahaka no Obama. A no laila, i kēlā pule aku nei, ua ho'okohu 'o ia iā Roland Burris, he loio kuhina no Illinois ma mua a he pā'ele ho'i, i panihakahaka no ka noho kenekoa o Obama. I loa nō a ho'okohu 'ia ua 'o Burris, 'o ka hū a'ela nō ia o ka leo hauwala'au o nā kenekoa e hō'ole ana i ka pono o kona ho'okohu 'ia e Blagojevich 'oiai kēia hihia e ho'okolokolo 'ia ana.

I ka hala 'ana na'e o kēlā pule mua o nēia makahiki hou, 'o ka hele akula no ia o Burris i Wakinekona me ka mana'o pa'a e noho 'o ia ma kona noho kenekoa i ho'okohu 'ia ai. I kona mana'o ho'i, 'a'ohe ona hewa i ka ho'okohu 'ia a he kuleana kū i ke kānāwai ko Blagojevich e ho'okohu ai iā ia i kenekoa kūikawā. 'A'ohe kumu e hō'ole 'ia ai kēia ho'okohu 'ia 'ana ona. A i kēia manawa, ke 'ike 'ia nei ke ku'ihē 'ana o ua mau kenekoa kemokalaka lā a kohu mea lā, e loli ana ka mana'o kū'ē, a e 'āpono 'ia ana 'o Burris i kenekoa kūikawā no Illinois.

Ma muli o ko Blagojevich hō'ole 'ana i ka mana'o koikoi o nā kenekoa e ho'ōki 'o ia i ka lawelawe 'ana i kona mau kuleana pili i kona kūlana he kia'āina, ua 'ikea kona 'ano po'o pa'akikī a kū'ē'ē ho'i, a i ka mana'o o ka nui o ka po'e “expert”, 'a'ole nō e nele ka hō'ole 'ana o ke kenekoa i ke komo 'ana o Burris ma loko o ko lākou 'aha. Kainō a e hā'ule pahū ana kēia mana'o o Blagojevich, 'a'ole kā! I loko nō o ka nui o ka mana o ka 'Aha Kenekoa, 'a'ole hiki iā lākou ke pani i ka puka o ka hale. Ua 'oi aku ke akamai o ia kia'āina ho'okahi wale nō ma mua o ka hapanui o ka 'Aha Kenekoa. He nui pūmai'a kā!

'Auhea 'oukou e nā hoa heluhelu, e aho e kāpae 'ia ua mau nui pūmai'a nei a e ho'okohu 'ia ua 'o Blagojevich i luna no ka 'Aha Kenekoa. I kau auane'i ke kuleana ma luna o kona hokua, mali'a o lawa kona akamai e ho'opau koke ai i ia mau pilikia he nui a kākou e ho'omanawanui nei. Ua 'ikea ka nele o ia 'ano akamai ma loko o kēia 'Aha Kenekoa ikaika 'ole e noho nei.