Synopsis: Old-fashioned bullying has been moved from the playground and relocated in cyber space making it anonymous and difficult to prevent.

UNICODE

Aloha Makahiki Hou e nā hoa heluhelu o ka 'ōlelo kanaka o nēia 'āina aloha. Ua hiki mai nei ka makahiki 2009 i o kākou nei a hiki pū mai nō me nā mea hou o ka 'āina i 'ike 'ole 'ia ma mua. 'O kekahi o ia mau mea hou lā o ka 'āina, he mea ho'i ia e komo ai ka menemene keiki i loko o kēlā me kēia makua, 'o ia nō ia mea e kapa 'ia nei 'o ka “cyber bullying”.

He hana 'ino kēia i lawelawe 'ia ma o ka pūnaewwele puni honua (a ma o ke kelepona lawe lima i kekahi manawa), kahi e ho'oma'au ai kekahi 'ōpio i kekahi 'ōpio. He nui loa nā 'ano o ia ho'oma'au uila 'ana e like ho'i me ka nui o nā mana'o e kupu mai ai i ka no'ono'o o nā 'ōpio nāna e hana. 'A'ole wale nō 'o ka 'ōlelo ho'oweliweli a hō'a'ano paha ka mea e ho'ouna 'ia. He haku 'epa ka 'ōlelo i kekahi manawa a e ho'olaha 'ia aku i mua o ke ākea, kahi e 'ike 'ia ai e nā kānaka a pau i kama'āina i ka luahi. 'O kekahi 'ano ho'oma'au uila, 'o ia ka ho'okumu 'ana i 'ao'ao pūnaewele no ka 'imi hana aku iā ha'i. E mālama 'ia paha kekahi 'ao'ao pūnaewele no ke ana 'ana i ka mana'o o nā hoa kula no ke 'ano o ka luahi, he pupuka paha, he hūpō paha, he momona, ia mea aku, ia mea aku.

I ko'u wā 'ōpiopio, aia ka lawelawe 'ia o ka hana ho'oma'au ma ka pā pā'ani o ke kula. He limanui ka hana i ka hapanui o ka manawa a ua 'ike 'ia ka maka o ka mea nāna e hana nei. 'O kēia ho'oma'au hou 'ana, he nalo ka maka o ka lawehala i loko o ka uila. He hana malū ia na ka hōhē a 'o ia ihola nō ke 'ano o ke kanaka ho'oma'au. 'A'ohe ona maka'u i ka pāna'i 'ia mai e kona luahi. 'O ka mea 'āpiki, he mea ma'a mau ka lilo 'ana o ka mea i ho'oma'au uila 'ia i mea ho'oma'au aku iā ha'i. Aloha nō!

I ko'u lohe mua 'ana i ia 'ōlelo “cyber bullying”, ha'oha'o ihola nō au me ka no'ono'o i loko o'u, “Pehea lā e hiki ai i kekahi kanaka ke ho'oma'au aku iā ha'i ma o ke kamepiula? 'A'ole wahi ho'opā 'ana aku a ka lima.” 'O ke akamai nō na'e o kēia po'e i ka hana ho'oma'au uila, he 'ikea nō kā lākou 'eha, a i kekahi manawa, 'o ke kaumaha loa o ka luahi, 'a'ole hiki ke ho'omanawanui 'ia a e lawe 'o ia i kona ola pono'ī e like me ka hana a Megan Meier, he kaikamahine nona nā makahiki he 13 i ka'awe iā ia iho ma hope o ka ho'oma'au uila 'ia mai i ka makahiki 2006 e Lori Drew, he wahine o'o nona nā makahiki he 49 nāna i ho'omeamea keikikāne e makemake ana e ho'ālohaloha iā Megan. 'A'ohe mea e kaupale aku ai i ia 'ano hana malū, a 'o ia ihola nō ka mea e kau ai ka weli o nā mākua mea keiki.

I kanaka aha ia e lawelawe ai i kēia 'ano hana kū i ka 'ino? A no ke aha ho'i? 'Auhea 'oukou e nā mākua mea keiki, e mālama pono iā lākou o lilo auane'i i ka ho'oma'au uila 'ia mai.