![](OnePixWhite.gif)
Laiana Wong
Aloha nö ia
mau lä, ua hala
Synopsis: Fond memories reawakened at the recent C&K and Kalapana reunion concert.
I ka hopena pule nei i hala, ua 'äkoakoa nui maila ka po'e o ko'u pae like ma Waikïkï, ma lalo ho'i o ke kaupoku lani o ka Püpü o Waikïkï. He nanea ho'i kau kahi pepeiao i ka lohe hou 'ana i nä mele punahele o nä lä u'i, a häli'a wale aku nö ka mana'o i ia mau lä piha 'eu a lo'ohia 'ole nö ho'i. 'A'ohe mea e hopohopo ai a 'a'ohe kuleana e ho'okö ai. Aloha nö ia mau lä, ua hala.
'O Cecelio mä läua me Kapono kekahi hui hïmeni a 'o Kalapana kekahi. A i loko nö o ka nui o nä makahiki i hala mai ka wä mai i 'oki 'ia ai 'o kä läkou mau pä leo, 'o ia mau nani nö o nä leo a he 'oi aku nö paha ka 'eleu o nä manamana lima i ka panapana a me ke koekoe i nä pila. He 'uä wale a'e nö ka pihe hulö a ke anaina i ia wä koke iho nö i pa'ë mai ai nä huamele mua o "Friends", a 'o ia hulö nö pëlä i ke kani mai o këlä a me këia mele kaulana a läua 'elua. 'Alawa aku nö ka maka i 'ö a i 'ö, 'a'ohe nele ka 'ike 'ia o kekahi po'e e hïmeni pü ana me nä pu'ukani, a ua pa'a ho'i nä hua'ölelo a pau. Aloha nö ia mau lä, ua hala.
A pau ka ho'okani a C&K, 'a'ole nö i li'uli'u a kü mai ana 'o Kalapana i ke kahua. I lawa nö a lohe 'ia ka panapana 'ana a DJ Pratt i nä huamele mua o "Black Sand", ho'omaka ke kapalili 'ana o ka wëlau alelo o kekahi po'e me ka ho'ä'o pü 'ana e ho'opilipili i ia mau huamele e like me ka mea i kuni 'ia a pa'a i ka na'au. Häli'a ka mana'o o ka po'e pömaika'i i 'ike maka i ia one ma mua o kona loa'a pono aku i ka lima ku'i o Pele i kapa 'ia 'o Kïlauea. A i ka wä i pa'ë mai ai ka leo o ke kakopona a Michael Paulo, lilo ka no'ono'o i kahi 'ë, a i kahi wä ho'i. A i kona iho 'ana mai i waena o ke anaina, e ka'i ana i 'ö a i 'ane'i me ka ho'okani pü 'ana i kahi kakopona äna, 'a'ohe ona pakele i ke kukui mälamalama e hahai mai ana, a 'a'ohe nö he leo hulö a lohe mai i ke a'o. Ho'okahi wale nö mea i 'oi a'e kona nahenahe, a 'o ia nö ka leo o Malani Bilyeu. Iä ia e hïmeni ana i käna mau mele kaulana, e la'a me "Dorothy Louise", a me käna mau mele hou, e la'a me ka "Water Song", 'a'ohe nö a he lua e like ai. A i kona hïmeni 'ana iä "Naturally", hä'upu nö au i ka hana no'eau o nä lä u'i, 'o ia ho'i ia mea he ho'oipoipo. Aloha nö ia mau lä, ua hala.
'O ka'u mea wale nö o ka minamina, 'o ia nö nä mele a Mackey Feary. 'A'ohe o'u mana'o e ho'ohalahala i ka leo o Kenji Sano. He leo nahenahe 'i'o nö kona a he nani ho'ä'o nö ia. Eia na'e, 'a'ole loa'a ke külana pu'ukani o Mackey, a i ko'u mana'o, e aho ka hïmeni 'ana i ia mau mele e like me kona 'ano pono'ï, a 'a'ole e ho'opilipili i ka leo o Mackey, no ka mea, 'a'ohe lua e like ai me ia. Aloha nö 'o Mackey Feary, ua hala.
Mahalo piha iä C&K a me Kalapana no ka ho'omau 'ana i ia mau mele a me ka noke 'ana i ka haku mele hou. A mahalo nö ho'i ka hui pü 'ana me ka mälama 'ana i këia 'ano 'ahamele ho'ohäli'a. E kala loa ko'u honi 'ana i ka mäpu mai o ke 'ala o ia mea he pakalölö ma waho o ke äkea. Aloha nö ia mau lä, ua hala. 'A'ole na'e i hala loa.
E ho'ouna 'ia mai nä leka iä mäua,
'o ia ho'i 'o Laiana Wong a me Kekeha Solis
ma ka pahu leka uila ma lalo nei:
>> kwong@hawaii.edu
>> rsolis@hawaii.edu
![](OnePixWhite.gif)
a i 'ole ia, ma ke kelepona:
>> 956-2627 (Laiana)
>> 956-2624 (Kekeha)
![](OnePixWhite.gif)
BACK TO TOP
|
![](blank.gif) | Note: This version of the column is set in Unicode, which requires current Web-browser software (Netscape 7 or Internet Explorer 6 on most operating systems.) If the Hawaiian text below does not display properly, you may want to use the version coded for older browsers (above) instead.
|
![](blank.gif) |
|
Laiana Wong
Aloha nō ia
mau lā, ua hala
Synopsis: Fond memories reawakened at the recent C&K and Kalapana reunion concert.
I ka hopena pule nei i hala, ua 'ākoakoa nui maila ka po'e o ko'u pae like ma Waikīkī, ma lalo ho'i o ke kaupoku lani o ka Pūpū o Waikīkī. He nanea ho'i kau kahi pepeiao i ka lohe hou 'ana i nā mele punahele o nā lā u'i, a hāli'a wale aku nō ka mana'o i ia mau lā piha 'eu a lo'ohia 'ole nō ho'i. 'A'ohe mea e hopohopo ai a 'a'ohe kuleana e ho'okō ai. Aloha nō ia mau lā, ua hala.
'O Cecelio mā lāua me Kapono kekahi hui hīmeni a 'o Kalapana kekahi. A i loko nō o ka nui o nā makahiki i hala mai ka wā mai i 'oki 'ia ai 'o kā lākou mau pā leo, 'o ia mau nani nō o nā leo a he 'oi aku nō paha ka 'eleu o nā manamana lima i ka panapana a me ke koekoe i nā pila. He 'uā wale a'e nō ka pihe hulō a ke anaina i ia wā koke iho nō i pa'ē mai ai nā huamele mua o "Friends", a 'o ia hulō nō pēlā i ke kani mai o kēlā a me kēia mele kaulana a lāua 'elua. 'Alawa aku nō ka maka i 'ō a i 'ō, 'a'ohe nele ka 'ike 'ia o kekahi po'e e hīmeni pū ana me nā pu'ukani, a ua pa'a ho'i nā hua'ōlelo a pau. Aloha nō ia mau lā, ua hala.
A pau ka ho'okani a C&K, 'a'ole nō i li'uli'u a kū mai ana 'o Kalapana i ke kahua. I lawa nō a lohe 'ia ka panapana 'ana a DJ Pratt i nā huamele mua o "Black Sand", ho'omaka ke kapalili 'ana o ka wēlau alelo o kekahi po'e me ka ho'ā'o pū 'ana e ho'opilipili i ia mau huamele e like me ka mea i kuni 'ia a pa'a i ka na'au. Hāli'a ka mana'o o ka po'e pōmaika'i i 'ike maka i ia one ma mua o kona loa'a pono aku i ka lima ku'i o Pele i kapa 'ia 'o Kīlauea. A i ka wā i pa'ē mai ai ka leo o ke kakopona a Michael Paulo, lilo ka no'ono'o i kahi 'ē, a i kahi wā ho'i. A i kona iho 'ana mai i waena o ke anaina, e ka'i ana i 'ō a i 'ane'i me ka ho'okani pū 'ana i kahi kakopona āna, 'a'ohe ona pakele i ke kukui mālamalama e hahai mai ana, a 'a'ohe nō he leo hulō a lohe mai i ke a'o. Ho'okahi wale nō mea i 'oi a'e kona nahenahe, a 'o ia nō ka leo o Malani Bilyeu. Iā ia e hīmeni ana i kāna mau mele kaulana, e la'a me "Dorothy Louise", a me kāna mau mele hou, e la'a me ka "Water Song", 'a'ohe nō a he lua e like ai. A i kona hīmeni 'ana iā "Naturally", hā'upu nō au i ka hana no'eau o nā lā u'i, 'o ia ho'i ia mea he ho'oipoipo. Aloha nō ia mau lā, ua hala.
'O ka'u mea wale nō o ka minamina, 'o ia nō nā mele a Mackey Feary. 'A'ohe o'u mana'o e ho'ohalahala i ka leo o Kenji Sano. He leo nahenahe 'i'o nō kona a he nani ho'ā'o nō ia. Eia na'e, 'a'ole loa'a ke kūlana pu'ukani o Mackey, a i ko'u mana'o, e aho ka hīmeni 'ana i ia mau mele e like me kona 'ano pono'ī, a 'a'ole e ho'opilipili i ka leo o Mackey, no ka mea, 'a'ohe lua e like ai me ia. Aloha nō 'o Mackey Feary, ua hala.
Mahalo piha iā C&K a me Kalapana no ka ho'omau 'ana i ia mau mele a me ka noke 'ana i ka haku mele hou. A mahalo nō ho'i ka hui pū 'ana me ka mālama 'ana i kēia 'ano 'ahamele ho'ohāli'a. E kala loa ko'u honi 'ana i ka māpu mai o ke 'ala o ia mea he pakalōlō ma waho o ke ākea. Aloha nō ia mau lā, ua hala. 'A'ole na'e i hala loa.
E ho'ouna 'ia mai nā leka iā māua,
'o ia ho'i 'o Laiana Wong a me Kekeha Solis
ma ka pahu leka uila ma lalo nei:
>> kwong@hawaii.edu
>> rsolis@hawaii.edu
![](OnePixWhite.gif)
a i 'ole ia, ma ke kelepona:
>> 956-2627 (Laiana)
>> 956-2624 (Kekeha)
![](OnePixWhite.gif)
This column is coordinated by the Hawaiian Language Department
at the University of Hawai'i at Mānoa, supported by UH
President Evan Dobelle's Initiative for Achieving Native Hawaiian
Academic Excellence.