Quantcast
StarBulletin.com

'O Wai Ko'u Hoa Kupa?


By

POSTED: Saturday, May 02, 2009

Synopsis: The Hawaiian Kingdom citizenry consists of both ethnic Hawaiians and naturalized foreigners and their descendants.

———

Na ka 'Aha'ōlelo o ke Aupuni Mō'ī i kau i ke kānāwai no ke 'ano o ke kupa a me ka ho'okupa 'ana. 'O ka po'e Hawai'i 'ōiwi ka po'e mua ma kēia pae'āina. No laila, he po'e kupa 'i'o ka po'e 'ōiwi o ke Aupuni Mō'ī a he “kanaka maoli” ka 'ōlelo no ia kanaka ma ke kānāwai.

No nā lāhui ‘ē i hiki mai i kēia pae'āina, hō'ike 'ia ka hana e lilo ai ka malihini he kupa o ke aupuni ma ke Kānāwai Ho'onohonoho o ka MH 1845 me ka 1846. Ma ia kānāwai, he pono ka lāhui 'ē e noho 'elima makahiki ma ka pae'āina nei ma mua o ka noi 'ana e lilo he kupa. Inā ho'okupa 'ia kekahi lāhui 'ē, ho'omaopopo 'ia 'o ia ma ke 'ano he “haole Hawai'i”. ‘O ke ‘ano o ia mea he haole ma ke kānāwai, 'o ia ho'i, he lāhui 'ē o nā 'ano like 'ole.

Hō'ike 'ia 'o ke kanaka i hānau 'ia ma ka pae'āina nei, he kupa 'o ia, a i 'ole inā hānau 'ia kekahi ma ka 'āina 'ē na nā mākua Hawai'i 'ōiwi a i 'ole na nā mākua i ho'okupa 'ia, he kupa nō 'o ia. 'O ka haole e makemake ana e lilo he kupa o ka 'āina, inā ho'ohiki 'o ia i kona aloha i ka Mō'ī, waiho 'ia kona kūlana kupa o kona 'āina i hele mai nei a lilo 'o ia he kupa o ke Aupuni Mō'ī.

'O kekahi kūlana kupa, 'o ia ia mea he haole i ho'okupa 'ia (“denizen” ma ka 'ōlelo Pelekānia). He kupa nō ke kanaka o kēia kūlana, akā, 'o ka Mō'ī wale nō ka mea hiki ke hā'awi i kēia kūlana kupa a mālama ia kanaka i kona kūlana kupa o kona 'āina i hele mai nei. I mea kēia kūlana kupa kūikawā e lako ai ke aupuni i ka po'e i mākaukau ma nā 'ano 'oihana like 'ole e pono ai ke aupuni inā he kuhina 'oe, he 'elele 'oe no ko nā 'āina 'ē, a pēlā aku nō.

Ma ka helu kanaka 'ana o ka MH 1890, penei ka hō'ike no nā kupa o ka 'āina: huina kanaka pau loa, 48,107; kanaka 'ōiwi (koko piha a i 'ole 'ō'ā 'ia), 40,622; Pukikī, 4,117; Pākē me ke Kepanī, 1,701; kanaka 'ili ke'oke'o, 1,617; haole Hawai'i, 60; kanaka kupa o nā 'āina 'ē, 41,883.

Ma kēia hō'ike, hiki ke 'ike 'ia ua helu 'ia nā po'e o nā lāhui like 'ole i loko o ia mana'o he kupa. E like nō me ia ma ka 'āina 'o Pīkī, 'o ke kupa o ka 'āina, inā he 'ōiwi a i 'ole he lāhui 'ē i ho'okupa 'ia, helu 'ia 'o ia he kanaka Pīkī. Pēia pū i helu 'ia ai ma lalo o ke kānāwai o ke Aupuni Mō'ī he kanaka Hawai'i nā kupa a pau loa o ka 'āina. Ua like a like nā kuleana a pau o kēlā me kēia kupa; he koho pāloka i nā lālā o ka 'Aha'ōlelo, he uku i ka 'auhau a ho'omalu 'ia ma lalo o ke Kumu Kānāwai a me nā kānāwai.

No laila, i mea e nānā 'ia ai nā pono a pau o ke aupuni, e no'ono'o nō kākou i nā kupa a pau. Pono iā kākou ke kāko'o o nā kupa a pau loa o ke aupuni ma ke kūkulu hou 'ana i ke aupuni. I mea e ho'omaopopo ai inā he kupa lāhui 'ē 'oe o ke Aupuni Mō'ī, he kōkua kēia wahi ma ka Internet: www.hawaiiankingdom.org/info-registry.shtml.

———

E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

» .(JavaScript must be enabled to view this email address)
» .(JavaScript must be enabled to view this email address)

a i ‘ole ia, ma ke kelepona:
» 956-2627 (Laiana)
» 956-2624 (Kekeha)

This column is coordinated by the Hawaiian Language Department at the University of Hawai'i at Mānoa, supported by the Initiative for Achieving Native Hawaiian Academic Excellence.