Synopsis: A formal tribute in Hawaiian poetry to the beloved “;Aunty Dottie Thompson.”;

Aloha e nā makamaka o Kauakūkalahale. I ka lā 19 o ka mahina nei 'o Malaki, ua lele akula ko kākou mea aloha 'o Aunty Dottie Thompson i ke ao polohiwa a Kāne e luana pū ai me kona mau hoa pili 'o Keoki makamae lāua me 'Iolani aloha. 'O Aunty Dottie ka luna ho'olauka'i aloha nui 'ia o ka ho'okūkū hula i kapa 'ia 'o Merrie Monarch a e kaulana nei kona inoa a puni ka honua. Ua haku 'ia mai nei 'ekolu mele ho'ohāli'ali'a e Kimo Alama Keaulana, Keawe Lopes, a me Kīhei deSilva. Eia mai nō ua pa'i 'ia ma lalo nei. Eia ho'i mākou, nā luna o Kauakūkalahale ke ho'ouna pū aku nei i ko mākou aloha iā ia a me kona 'ohana.

He 'ū a he aloha no ku'u wahine

Mai ka ua hukihe'enehu o Hilo

Ka ua kanilehua ho'opulu i ka 'ili o ko laila kupa

Ku'u lei makamae no ke kai o Mokuola

I ka'ili i nā lima menemene 'ole i ka pō

Hana ne'e ke kīkala o ko Hilo kini

Ho'i lu'ulu'u i ke one o Hanakahi

He pū'olo waimaka no ka mea hele

I ke alahula ho'i 'ole mai!

Auē! Ua hala 'o Aunty Dottie Thompson

Me ka minamina pau 'ole!

—Na Kimo Alama Keaulana

He 'ū a he aloha no ku'u wahine

Wahine i ka ua mao 'ole la o Hilo

'Ohu'ohu ia uka i ka lei mai a ke ao lalahiwa

E loloku mai nei i ka 'uwē a ka 'ōpua

Kahe makawalu nei Wailoa a i ke kai

Kai 'ula weli ko Puhi i ka 'alalauā

Ku'u wahine i ka paia 'a'ala i ka hala

Kūpouli Puna i ka pili a Ka'ōnohi me Ka'ula

Nalo pū ihola i ka lawe 'ia a lilo i ka moana

Huli ho'okahi ke alo i ke ala ho'i 'ole mai

E luana ma ia Ha'eha'e o Beula la i ka la'i!

Auē! Ua hala 'o Aunty Dottie Thompson

Me ka minamina pau 'ole!

—Na Keawe Lopes

He 'ū a he aloha no ku'u wahine

Lohaloha pele'unu Hilo i ka ua hālau lani

Niau kololani akula 'oe i ke one wali o 'Ōhele

Hele ka 'uhane kui lei lehua o Mōkaulele, pāpahi lei o Haili

'Okia pahu 'ia ka hala 'oki kepa o Pana'ewa e ka 'uhane kui lei

Auē! Ua lilo ku'u hoa 'anakē i ke one lau'ena o Kāne

Ke noho maila me Lilinoe i ka mauna, me nā wahine kui pua o Kīlauea

Aia me Kawelu i ka pua, me Hikuanaka e hi'olani nei

Ke au nei ka mana'o i ka hala pua 'ilima o Wailea

Me he wai lā e 'ale nei ka hāko'i a ke aloha

'O ka 'ū, 'o ka minamina, 'o ka paumākō iā 'oe

Auē! Ua hala 'o Aunty Dottie Thompson

Me ka minamina pau 'ole!

— Na Kīhei de Silva

E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:
» .(JavaScript must be enabled to view this email address)
» .(JavaScript must be enabled to view this email address)
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai'i at Mānoa, supported by the Initiative for Achieving Native Hawaiian Academic Excellence.