StarBulletin.com

He aha ko ka po?


By

POSTED: Saturday, January 16, 2010

Synopsis: A dream by Lokalia in 1895 prophesying of Lili‘uokalani’s eventual triumph. First published in Ka Makaainana, March 30, 1896. Part 1 of 2. Reproduced here to match the original spelling system.

———

Ma ka po o ka la 26 o Dekemaba, 1895, mawaena o ka hora 12 a.m. a me 6 a.m., loaa iho la ia’u keia moeuhane, oia keia:

Ike aku la ko’u uhane i ka Halealii a komo aku la au, a pa mai la ka hea a ka Moiwahine Kapiolani e i ae na pua’lii. Ano hopohopo iho la au, a pane mai la ke Aliiwahine Kapiolani, “E hele aku oe e ike i ka Moi, e i aku no iloko o ka Halealii.” A hele aku la au me ke ano hopepe a ike io aku la au i ka Moiwahine Liliu a me ka Moi Kalakaua, a hele aku la au e aloha.

Mahope iho, ike mai la au i ko’u mau hoa e hele ae ana me na kahili a hele loa aku la no kahi a Kapiolani e noho ana, a pane mai la nae o Kapiolani, “E i aku no na alii iloko o ka Halealii.”

Mahope iho o ia wa, hoomaopopo iho la au he puu kiekie ke ku ana ma ka aoao hikina o ka halealii, a ma ko’u koho aku, me he la, o kekahi hapa no paha ia o ka Halealii ua lilo ae la i puu; aka, o ka mea kupanaha a’u e ike nei, o ka pii ana o ka Moiwahine Liliuokalani iluna o ua puu nei. Ia wa ike aku la au i ka Moiwahine Liliu aia oia ke aneane aku la e hiki i ka piko o ua puu nei. A pa mai la kana kahea ia’u e pii aku, a lohe aku no hoi au i ko Kapiolani leo i ka i ana mai ia makou e ukali aku i ka Moiwahine Liliu, a pau nui mai la makou i ka hele. Ia wa kahea mai la ka Moiwahine ia Kaehuwahanui (w) e pii aku, a pii aku la o Kaehuwahanui me kana kahili, aole nae ia i hiki aku i kahi a ka Moiwahine Liliu i ku ai, kahea e mai la ia ia Hakaleleponi a pii aku la ia me kaua kahili. I ko Hakaleleponi pii ana aku, aole hoi ia i hiki aku i ka Kaehuwahanui wahi i pii aku ai, kahea mai la oia ia Makanoe (w) e pii aku, a pii aku la ia me kana kahili. Aole no hoi ia i hiki aku i ka Hakaleleponi wahi i ku ai, kahea mai la oia ia Ane Kaulukou e pii aku, a pii aku la ia me kana kahili; a aole no hoi ia i hiki aku i ka Makanoe wahi i pii ai, kahea e mai la ia ia Kieke Kaae e pii aku, a pii aku la ia ia.

I ko’u hoomaopopo ana aku, ike aku ia au i ka Moiwahine Liliu aia oia maluna o ka piko o ua puu nei, e noho ana ia me elua wahine hapa-haole ma kona mau aoao, a ma ko’u koho aku no ua mau wahine ia ma ko laua helehelena maka, he like ko laua ano me Pauahi Bihopa a me Ema Kaleleonalani. A maluna o keia puu i ike aku ai au i kekahi pahuhae, aole nae he hae e kau ana; a ike pu aku la no hoi au he anuenue e pio ana a me ka onohi e ku ana. A ike aku la no hoi au i ko’u mau hoa me na kahili ua hoopuni ae la lakou i ua puu nei, a puoho ae la au.

LOKALIA.

Hoakakaia ua moe nei e ka moike i keia pule ae. Hoomau ia.

———

E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

» .(JavaScript must be enabled to view this email address)

» .(JavaScript must be enabled to view this email address)

a i ‘ole ia, ma ke kelepona:

» 956-2627 (Laiana)

» 956-2624 (Kekeha)

———

This column is coordinated by the Hawaiian Language Department at the University of Hawai'i at Mānoa, supported by the Initiative for Achieving Native Hawaiian Academic Excellence.