Quantcast
StarBulletin.com

He 'Ohana Ho'omana'o


By

POSTED: Saturday, October 17, 2009

Ua lawelawe 'o Makua Kamiana i nā mea ma'i i ka ma'i Pākē ma Kalaupapa me Kalawao mai ka MH 1873 a hiki i kona make 'ana i ka 1889.

Ma ka 1892, hānau 'ia kahi James Asing Kaaialii ma Waihe'e, Maui a male a'ela 'o ia iā Elizabeth Kapeka Kakalia no Nā'ālehu, Hawai'i a i laila nō ho'i lāua kahi i ho'opūnana ai. Hānau na lāua 'eono kaikamāhine. A hānau 'ia ka 'elima o kā lāua keiki, loa'a a'ela 'o James i ka ma'i Pākē. Lawe 'ia 'o ia i Kalaupapa e ho'opa'a 'ia ai me nā mea ma'i a pau i ia ma‘i ho'okahi nō.

No ke kūpiliki'i 'ino o ka 'ohana i ka lawe 'ia o ka makua kāne i Kalaupapa, lawe hānai 'ia nā kaikamāhine pākahi e kekahi po'e 'ohana—kekahi he pili koko nō, a kekahi, 'a'ole. Aloha nō ho'i ka walania o ka 'eha i ka wehe 'ia o nā keiki mai ka poli a'e o nā mākua me ka pūehuehu pū o kēlā me kēia a puni ka Pae'āina.

Ma ka pōmaika'i, 'ae 'ia e hele pū 'o Kapeka me kāna kāne no ka mālama iā ia me ka loa'a nō o kekahi kānāwai e pāpā ana i ka po'e i maika'i o ke ola e noho ma Kalaupapa. Hānau na lāua ho'okahi hou kaikamahine ma laila.

I ka 1928, make 'o James i ka hopena mā'ino'ino o ia ma'i a kanu 'ia 'o ia ma ka pā kupapa'u o Kalaupapa i ka pili kahakai. Male hou 'o Kapeka he kāne hou, 'o Wiliama Kaulahao Keahi, he mea ma'i 'o ia o ia wahi a he makapō nō ho'i. Lawe hānai lāua nei i ka mo'opuna wahine a Wiliama i ma'i pū i ia ma'i nō, 'o Kuulei Bell kona inoa.

'A'ole i nui nā makahiki a hā'ule pū 'o Wiliama a kanu 'ia ma Kalaupapa. Me ka pau loa o kāna mau kāne 'elua, ua pono loa 'o Kapeka e ha'alele.

'A'ole i poina nā kaikamāhine a James lāua 'o Kapeka kekahi i kekahi a hui hou nō lākou i ko lākou wā kanaka makua a hui hou nō ho'i me ko lākou makuahine aloha, ka mea a lākou i 'ike 'ole ai no nā makahiki he nui. Ma hope o kona ha'alele 'ana iā Kalaupapa, noho 'o Kapeka me ka 'elua o kāna kaikamahine, 'o Annie, ka mea i male iā Sam Kauhane, ma Hau'ula, O'ahu a make 'o ia i ka 1972.

Ma nā kai mimiki o ka 1946 a me ka 1960, ua lilo loa ka pōhaku inoa o ka lua kupapa'u o James a nalowale loa, akā, 'oia mau nō ka pōhaku inoa o Wiliama a hiki i kēia lā. Pehea i pa'a ai i kēia mea kākau kēia mo'olelo? No ka mea, ho'omaopopo nō 'o ia iā Kapeka. 'O ia kona kupuna wahine kuakahi. 'O Annie kona kupuna wahine, ka makuahine o kona makuahine. I ka 1996, huaka'i aku nei 'o ia i Kalaupapa a na kona 'anakē, 'o Kuulei Bell, i lawe hele iā ia e māka'ika'i i nā wahi pili i kona 'ohana ma ia ‘āina.

Na kēia Kuulei Bell i ho'olei i ka lei i luna o ka Pope John Paul II i ka 1995 ma Brussels, Belgium i ka ho'ohanohano 'ia 'ana o Makua Kamiana. No laila, ua pā kēia 'ohana i nā hana a Makua Kamiana a he luana iki kēia e ho'omana'o ai.

 

E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

» .(JavaScript must be enabled to view this email address)

» .(JavaScript must be enabled to view this email address)

a i ‘ole ia, ma ke kelepona:

» 956-2627 (Laiana)

» 956-2624 (Kekeha)

This column is coordinated by the Hawaiian Language Department at the University of Hawai'i at Mānoa, supported by the Initiative for Achieving Native Hawaiian Academic Excellence.