Quantcast
StarBulletin.com

Mokomoko Pulukeke


By

POSTED: Saturday, August 29, 2009

Synopsis: A serious blow was delivered to the integrity of boxing last Saturday night as a questionable decision was rendered in favor of Juan Diaz in his 12-round bout with Paulie Malignaggi.

———

Aloha mai kākou e nā hoa o Kauakūkalahale i puni i ka nānā a māka'ika'i aku paha i ia mea le'ale'a i kapa 'ia he mokomoko. Ua 'ike 'oukou i ka ho'okūkū mokomoko i mālama 'ia i ka pō Pō'aono nei i hala ma HBO? E kū'ē ana 'o Juan “Baby Bull” Diaz iā Paulie “The Magic Man” Malignaggi ma Houston, Texas. He nui a lehulehu ka po'e i nānā i kēlā ho'okūkū māhanahana, a he mea ho'ohiala'ai ho'i kau! I loko nō o ka limanui pau 'ole 'ana mai a Diaz i kēlā me kēia puni, ua akamai 'i'o nō ua 'o Malignaggi (he kohu puhi 'ōlalilali lā ke nānā aku) i ka hō'alo 'ana i ko ia ala mau pu'upu'u lima e houhou mai ana me ka mana'o ho'opau i kā ia nei hana a ho'opio i kā ia nei ahi. 'O ia ku'i māhanahana nō o kēlā 'ao'ao kēia 'ao'ao a kani ka pele i ka pau 'ana o ka puni 12, ka palena ho'i o ka ho'okūkū. A pau mai ke ku'i houhou 'ana o nā lima, 'o ia kū 'ana nō ia o ua mau kānaka mokomoko lā a 'elua.

He mea maopopo, 'a'ole i akāka ka mea i lilo iā ia ke eo ma kēia hookūkū. No'u iho, ua lilo ke eo iā Malignaggi. 'A'ole na'e o'u mana ho'oholo ma laila. Aia nō ia i ka lima o nā luna loiloi. 'O ia ihola ka mea e nui nei ka pihe hauwala'au a ka po'e puni mokomoko. Ua 'ike 'ia ua po'e luna loiloi nei he mau kānaka no Texas, a ua 'ike 'ia ho'i ke 'ano pa'ewa o nā 'ai i lilo ai ke eo iā Diaz, 'o ia ho'i, he 115-113 (na Raul Caiz), 116-112 (David Sutherland), a he 118-110 (Gale Van Hoye). 'O ka pa'ewa loa o kā Van Hoye 'ai, ke 'ōlelo 'ia nei he ha'uki ho'omeamea wale nō ka mokomoko, he kohu WWE ho'i ka hoa like, a he hana 'āpuka nō ho'i ia e pau ai ka hoihoi o ka po'e puni mokomoko.

I ka nīnauele 'ia o Malignaggi, nemanema 'o ia i nā luna loiloi i ke kaulike 'ole, a kapa akula ho'i i ka ha'uki mokomoko i ka pulukeke. Eia nō kā ka mea kohu 'ole. Ma ia hope mai, hō'ike maila ka mea kūkala mokomoko o HBO, 'o Max Kellerman, na ka “market” 'o Malignaggi i pepehi, a no ka mea, 'a'ole lawa ka ikaika o kāna ku'i lima e like me Diaz. 'O ka mea ia i lilo ai 'o Diaz i punahele na ka poe puni mokomoko, a lilo ai ho'i 'o Malignaggi i mea 'ole wale nō i mua o lākou. He aha lā kēlā 'ano? Aia i laila ka pulukeke! No kona maka'u o pā mai auane'i i ka leo o kona mau luna ma HBO, 'a'ohe wahi hō'āhewa a Kellerman i ka luna loiloi Van Hoye i ke kūpono 'ole o kāna hana, a me ke komikina mokomoko no ka 'ae 'ana iā ia e noho i luna loiloi. 'A'ole 'o ia i kāko'o i ka mana'o o Malignaggi ē he pulukeke ka mokomoko. Ma kahi o ke kūpa'a 'ana ma hope o ka pono, ho'oili aku na'e 'o ia i ka hewa i luna o Malignaggi a me kona ho'opunahele 'ole 'ia e ka “market”. Kā, 'eā, ua pio ko'u hoihoi i ka mokomoko. Na 'oukou nō 'oukou e nānā aku i ia mea. E nānā au i ka MMA.

———

E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

>> .(JavaScript must be enabled to view this email address)

>> .(JavaScript must be enabled to view this email address)

a i ‘ole ia, ma ke kelepona:

>> 956-2627 (Laiana)

>> 956-2624 (Kekeha)

This column is coordinated by the Hawaiian Language Department at the University of Hawai'i at Mānoa, supported by the Initiative for Achieving Native Hawaiian Academic Excellence.