Quantcast
StarBulletin.com

No Loko a No Waho


By

POSTED: Saturday, July 18, 2009

I nā makahiki 1820, ua kūkulu 'ia he mau kula 'ōlelo Pelekānia no nā keiki a nā mikionali 'ili ke'oke'o, akā, i ka MH 1839, ua ho'okumu 'ia ke kula no nā keiki ali'i Hawai'i i Moanalua a a'o 'ia ma ka 'ōlelo Pelekānia wale nō. A kūkulu 'ia nā kula 'ōlelo Pelekānia no ka lehulehu, ua hele a 'oi aku ka nui o nā keiki Hawai'i i hele i ia mau kula ma mua o nā kula 'ōlelo Hawai'i. I ka MH 1887, ua ho'okumu 'ia ke Kula Kamehameha no ke a'o 'ana i nā keiki Hawai'i ma ka 'ōlelo Pelekānia. Pāpā 'ia ke a'o 'ana ma ka 'ōlelo Hawai'i.

I ke au 'ana o ke kenekulia 'umi kumamāiwa, pi'i ka mana'o o ka lehulehu e mālama 'ia ka 'ōlelo Hawai'i a me ka 'ōlelo Pelekānia pū. Mai ka MH 1845 mai, ua kākau 'ia nā kānāwai o ke Aupuni ma ka 'ōlelo Hawai'i a me ka 'ōlelo Pelekānia, akā, i ka 1856, ma muli o ka hihia o Metcalf kū'ē iā Kaha'i ma ka 'Aha Ho'okolokolo Ki'eki'e o ke Aupuni Mō'ī, ua ho'oholo 'ia e lula ka mana 'ōlelo Pelekānia o ke kānāwai ma mua o ka mana 'ōlelo Hawai'i i ka wā pohihihi o ka ho‘omaopopo ‘ana.

Ma hope o ka ho'okahuli 'ia 'ana o ke Aupuni Mō'ī e ka pū'ulu kipi kū'ē i ka MH 1893, ua ho'oikaika lākou i ka ho'ohuli pū i ka 'ōlelo a ka lāhui me ko lākou nohona a me ka mana'o pū ma muli o ko nā kipi 'i'ini e hui pū ka 'āina me 'Amelika. Kau 'ia nā lula a me ke kānāwai e ho'opau ana i ka 'ōlelo Hawai'i ma nā kula, nā ke'ena aupuni, a me nā wahi hana like 'ole a ma ka hō'ike a Reinecke, i nā makahiki 1920, ua nui nā Hawai'i i pilikia i ka hana 'ole ma muli o ko lākou na'aupō i ka 'ōlelo Pelekānia.

Ua huli pū ka mana'o o ka lāhui i nā makahiki 1920. I ia mau makahiki nō, hiki mai 'o McMillian Brown, he luna o kekahi kulanui i Nukilani i Honolulu a hō'ike 'o ia ua 'oi aku nā keiki Hawai'i i 'ike 'ole i kā lākou 'ōlelo Makuahine ma mua o nā keiki Māori ma Nukilani. I ia wā like nō, ua ho'okumu 'ia kekahi papa ma ke Kula Kamehameha no ke a'o 'ana i ka 'ōlelo Hawai'i no ka 'ike 'ia o ka emi loa 'ana o nā keiki 'ōlelo Hawai'i. Akā, ua nui nā mākua Hawai'i i 'ōhumuhumu i nā luna no ia hana.

I loko o nā makahiki 1800, ua 'ike 'ia he kanawalu ka nui loa o nā inoa nūpepa 'ōlelo Hawai'i like 'ole a pēlā i ho'omaopopo 'ia ai ka lehulehu no nā hana like 'ole o ke ao a me nā mo'olelo ku'una pū, akā, ua hele a emi loa nā nūpepa 'ōlelo Hawai'i i ka wehe 'ana o ke kenekulia iwakālua, a i ka MH 1948, ua pani 'ia ka nūpepa 'ōlelo Hawai'i hope loa, 'o ia 'o Ka Hōkū o Hawai'i, ma muli o ka puka 'ole o ka waiwai ma ia hana no ka nele o ka po‘e heluhelu.

I ka wā o ke Kaua Honua II, ua pi'i loa ka ho'olaha 'ia o ka paipai aloha no 'Amelika, a emi loa ka hoihoi o ka lehulehu e mālama i ka nohona a me ka 'ōlelo Hawai'i.

No laila, no loko a no waho nō ka paipai 'ana e waiho i ka 'ōlelo Hawai'i.

E ho‘omau ‘ia.

 


E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

» .(JavaScript must be enabled to view this email address)
» .(JavaScript must be enabled to view this email address)

a i ‘ole ia, ma ke kelepona:

» 956-2627 (Laiana)
» 956-2624 (Kekeha)

This column is coordinated by the Hawaiian Language Department at the University of Hawai'i at Mānoa, supported by the Initiative for Achieving Native Hawaiian Academic Excellence.