Quantcast
StarBulletin.com

Kelepona lima 'ole


By

POSTED: Saturday, July 04, 2009

Synopsis: Will the new law banning the use of cell phones while driving make us any safer?


I ka Pō'akolu nei i hala, ua pili maila ke kānāwai e pāpā ana i ke kelepona lawe lima 'a'ole e ho'ohana 'ia ma luna o ke ka'a 'oiai e holo ana ka enekini. 'O ka hopena o ka 'a'e 'ana i kēia kānāwai hou, 'o ia ka ho'opa'i 'ia i ke $67 no ka manawa mua, a ua 'ōlelo 'ia e pi'i a'e ka ho'opa'i i ka $500 ke loa'a pinepine i ke kalaiwa me ke kama'ilio pū 'ana ma ke kelepona lawe lima. 'O ka mea e hō'alo ai i ua ho'opa'i 'o'ole'a nei, 'o ia ka waiho mālie 'ana i ke kelepona ‘oiai ma luna o ke ka'a, a i 'ole ia, ua hiki ke kū'ai i ia mea he hame'a Bluetooth. He mea ia e hiki ai i ka mea kalaiwa ke ho'ohana i kāna kelepona me ka ho'opa'a 'ole aku a ka lima. 'O ia ihola ka mana'o nui o ia po'o mana'o e kau maila ma luna “Kelepona lima 'ole”. 'O Wa'awa'a Iki mā na'e, mali'a o kuhihewa 'a'ohe lima o ia 'ano kelepona.

Ua mana'o 'ia he mea kēia kānāwai hou e emi ai ka nui o nā ulia ka'a ma ke alanui. 'O ka mea 'āpiki na'e, ua hele a ma'a loa ka nui o nā mea kelepona lawe lima i ke kama'ilio 'ana i nā wā a pau a ma nā wahi a pau, a 'o ka wā kalaiwa ka'a, ua lilo ia i wā ho'onanea i ke kama'ilio. I kanaka aha ia e ha'alele ai i ia 'ano hana ma'a loa? E mau ana nō ia. 'O ka po'e waiwai, hiki ke kū'ai i ka hame'a Bluetooth. 'O ka po'e ho'omākauli'i na'e a nele ho'i i ke kālā, 'a'ole paha lākou e kū'ai i ia mea. He pohā ka lae! E noke ana nō paha lākou i ka 'a'a 'ana i ke kama'ilio ma ke kelepona. 'O ka po'e waiwai ho'i, 'a'ole 'i'o nō kā lākou Bluetoth he mea lima 'ole. Aia nō ke kāhea 'ana aku i ka hoa kama'ilio a kaomi i ke pihi e kani ai ko ia ala helu. I mea ho'i e kaomi malū ai i ke pihi, e waiho 'ia ke kelepona ma lalo o ka 'ūhā a ma kahi ho'i e 'ike 'ole 'ia ai e ka māka'i. Pehea lā e hiki ai i ia kanaka ke nānā pono i ke alanui me ke kaomi pū 'ana i ke pihi? 'A'ole nō e nele ka māhuahua o nā ulia ka'a.

He nui hou aku nā hana e hana ai ma luna o ke ka'a e lilo ai ka no'ono'o o ka mea kalaiwa i kahi ‘ē. Ua hiki nō ke heluhelu puke, inu kope, 'ai kanauika, pena lehelehe, nānā i ka GPS, 'imi i mele ma ka Ipod, 'imi i kānela ma ka lekiō, kama'ilio he alo a he alo me nā 'ōhua ma ka noho o hope, nuku kamali'i, palaki lauoho, a me nā mea hūpō like he nui aku nō, me ka ho'opa'i 'ole 'ia. 'A'ole kēia he mau mea kū'ē kānāwai. He mau mea na'e ia e lilo ai ka no'ono'o i kahi ‘ē a māhuahua ai nō ho'i ka nui o nā ulia ka'a. Ua 'ike maka au i kēia mau hana a pau ma nā alanui o Honolulu nei. 'A'ole ho'i ia he mea kāka'ikahi wale nō.  Eia hou, he nui ka po'e i ma'a i ka ho'okele 'ana i ke ka'a me ka lima ho'okahi wale nō pehea lā ka pa'a a me ka 'ole o kekahi mea i loko o kekahi lima. He mea anei kēia e māhuahua ai ka nui o nā ulia ka'a?

'A'ole nō e hiki i ke aupuni ke ho'omalu iā kākou ma nā 'ano a pau. He ho'onui kānāwai wale nō kēia e lako ai ke aupuni i ke kālā. Na kākou nō ia e mālama iā kākou ma o ka hana pono a me ke akahele.


E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

» .(JavaScript must be enabled to view this email address)
» .(JavaScript must be enabled to view this email address)

a i ‘ole ia, ma ke kelepona:

» 956-2627 (Laiana)
» 956-2624 (Kekeha)

This column is coordinated by the Hawaiian Language Department at the University of Hawai'i at Mānoa, supported by the Initiative for Achieving Native Hawaiian Academic Excellence.