Quantcast
StarBulletin.com

Mai nānā  i ka lā'au malo'o


By

POSTED: Saturday, June 06, 2009

Synopsis: Flashy franchise stores such as Wal-Mart and Target have found a way into Hawai'i to the detriment of our local stores. So, too, has prepackaged curriculum found its way into our schools to the detriment of our traditional knowledge.

———

He mea mau i kēia mau lā ke kūkulu 'ia 'ana o nā hale kū'ai hou ma Hawai'i e like loa me ko 'Amelika hui pū 'ia. A no ka nui o nā kānaka e hele ana i nā hale kū'ai hou, nui loa nā hale kū'ai kūloko i pau i ka pani 'ia. Ua like nō paha me ka nui o nā kula e mālama 'ia nei ka ha'awina haole. Ke puni i ka 'ike o Maleka, 'o ia hopena like nō paha?

Nani nō ka ha'aheo o nā kini lehulehu i ia mea he kula kaiapuni Hawai'i. He waihona e mālama 'ia ai ka 'ike kupuna ma o ka 'ōlelo makuahine. Akā, ua lawa anei ka 'ōlelo e ho'oikaika ai i ka lāhui? Inā paha 'o nā ha'awina e kauka'i nui 'ia ma loko o nā lumi papa he mea e a'o wale 'ia ai ka 'ike haole ma o ka 'ōlelo Hawai'i, he makepono anei ka ho'oikaika 'ana i kēia hana 'o ka ho'ōla 'ōlelo Hawai'i? He mea nui nō ka mālama 'ana i ke kuana'ike Hawai'i. Ma ia mea e ha'aheo ai ka lāhui. A ke a'o 'ia nā ha'awina ma ka 'ōlelo ku'una, e mōakāka mai ka 'ike kupuna e kōli'uli'u nei.

Kainō a 'o nā kula kaiapuni Hawai'i kahi e mālama 'ia ai ka 'ōlelo me ia i lohe 'ia ai i ka wā kahiko, eia kā ke ānehe nei ka mana'o haole ma loko o ke a'o ma kēlā kula kēia kula ma muli o ia mea he hō'ike aupuni. Ho'okikina 'ia nā kumu e a'o i ka 'ike a kahi polokalamu haole e la'a 'o America’s Choice, Success For All, a me ia mea aku ia mea aku. He mau ha'awina ia i ho'omohala 'ia ma ka 'āina 'ē me ka mana'o ua like a like kēlā keiki me kēia keiki. Nui ka pohō o ke kālā aupuni i ho'olilo 'ia ma ke kū'ai i ka 'ike a ke kōlea. Huli kua 'ia nō ho'i nā 'ike pili i nā mamo a Hāloa. Inā 'a'ole nā keiki e 'a'apo i ia mau ha'awina a ke kōlea, e kuhi hewa 'ia paha lākou he mau hoa like no Wa'awa'a Iki Na'aupō. A pēlā e mau ai ka ho'okolonaio 'ia o kā kākou 'ōlelo pono'ī.

'Ehia mea aloha o nā kumu kaiapuni? A 'o wai lā ke mana'o e lilo i kumu kaiapuni? Pilikia nā kumu i ka mana o ke aupuni a me kona kaohi mai i ko lākou ea 'o ia nō 'oe 'o ka i'a i hei i ka 'upena.  Na wai nō e pakele i ia mana e noho nei ma loko o nā kānāwai a'o o kēia au? Ma lalo o ia kānāwai, e ho'okō kēlā me kēia kula i nā koina o ka NCLB, ka HSA, a me nā hō'ike mākaukau i koi 'ia e ke aupuni. A he mau mea ia e hōkai 'ia ai ka hana a nā kumu a e kāohi 'ia ai ho'i ka holomua o nā keiki. A 'o ka hopena, e nāwaliwali nā kula kaiapuni a e pani 'ia paha, a 'o ka pio nō ia o ke kukui mālamalama o ka 'ike Hawai'i.

'Auhea 'oukou e nā kumu e noi'i noelo nei i ka na'auao, e alu like kākou a e paio no ka pono o nā haumāna. E hilina'i i ke akamai o nā keiki Hawai'i. Ua lawa lākou i ka 'ike o nā kūpuna. Mai nō a 'ae iki iā ha'i e alaka'i iā kākou o pilikia auane'i. E nalowale ua ‘ike nei o nā kūpuna a 'a'ohe hope e ho'i ai. Mai nānā i ka lā'au malo'o, 'a'ohe mea loa'a o laila.

———

E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

» .(JavaScript must be enabled to view this email address)

» .(JavaScript must be enabled to view this email address)

a i ‘ole ia, ma ke kelepona:

» 956-2627 (Laiana)

» 956-2624 (Kekeha)

This column is coordinated by the Hawaiian Language Department at the University of Hawai'i at Mānoa, supported by the Initiative for Achieving Native Hawaiian Academic Excellence.