Quantcast
StarBulletin.com

Pale 'ia ka 'Ao'ao o ka Hewa


By

POSTED: Saturday, May 23, 2009

Ma ka 'oihana pili kānāwai, he kumumana'o 'oia'i'o ka haku 'ana i kekahi 'ike i mea e hūnā ai i kekahi 'ike pololei 'ole. 'O kahi i 'ike 'ia ai kēia hana, 'o ia ka 'aha ho'okolokolo i ka wā e makemake 'ole ai ka luna ho'okolokolo a i 'ole nā luna aupuni e ho'olohe i ke kānāwai a i 'ole ke Kumukānāwai.

Ma ka 'Aha Ho'okolokolo Ki'eki'e o 'Amelika Hui 'ia, ua haku 'ia he 'ōlelo palepale 'oia'i'o 'ole no ka pale 'ana i kekahi hewa, 'o ia ka ho'ouka kaua 'ana i ke Aupuni Mō'ī Hawai'i me ka noho koa pū 'ana ma ua 'āina nei me ka 'ole o ke ku'ikahi ma waena o ia mau aupuni kū'oko'a 'elua.

No ka nīnau pili i ia mea he 'āina i ho'ohui 'ia, 'o ka mea i ho'oholo 'ia e ka 'Aha Ho'okolokolo Ki'eki'e, penei ho'i: Ma hope o ka ho'okahuli 'ia 'ana o ke Aupuni Mō'ī Hawai'i i ka MH 1893, ua ho'ohui ka 'Aha'ōlelo i ke Kelikoli 'o Hawai'i ma ka ho'okō 'ana i ka 'Ōlelo Ho'oholo 'o Newlands, kahi i ho'oili ai 'o Hawai'i iā 'Amelika Hui 'ia i kona mana 'alolio holo'oko'a a me kona 'ona 'ana i nā 'āina no ka lehulehu, ke aupuni, a me ke kalaunu. I ka MH 1959, ua lilo 'o Hawai'i he moku'āina ma o ke Kānāwai 'Ae Hui a pēlā i ili ai nā 'āina o ka lehulehu i pa'a iā 'Amelika Hui 'ia ma luna ona, a kau 'ia he kuleana e mālama ka Moku'āina i kēia mau 'āina, hui pū me nā kālā puka ma ke kū'ai lilo 'ia 'ana o ia mau mea ma ke 'ano he waihona mālama waiwai no ka lehulehu.

'O ka 'Ōlelo Ho'oholo 'o Newlands, he 'ōlelo ho'oholo hui 'ia ia a ka 'Aha'ōlelo o 'Amelika i mana ma loko wale nō o nā palena o ia aupuni. 'A'ohe nō ona mana ma waho a'e o kona mau palena. Ua ho'okū 'ia 'o 'Amelika ma ka hō'ike aku he kuleana kona ma loko o ke Aupuni Mō'ī Hawai'i 'oiai he mau ku'ikahi nō ma waena o ia mau aupuni e hō'oia ana i ke kūlana kū'oko'a o kekahi a me kekahi.

'O ka 'ike pololei 'ole i haku 'ia ma ka 'ōlelo ho'oholo hui 'ia ma luna nei, 'o ia ho'i, 'a'ohe wahi ho'oili 'ia 'ana o ka mana 'alolio ma o kekahi 'ōlelo ho'oholo hui 'ia a ka 'Aha'ōlelo. 'O ka hana pololei, kūkulu 'ia he ku'ikahi no ia kumu. Ua ma'alea nō ho'i ka 'ōlelo o ka 'ōlelo ho'oholo nei, no ka mea, ua hō'alo pū 'ia kekahi hō'ike no ke kūlana kū'oko'a o ke Aupuni Mō'ī me ka 'ole o ke ku'ikahi.

Ke kauka'i nei ka 'Aha Ho'okolokolo Ki'eki'e ma luna o ka na'aupō o ka lehulehu i ka 'oihana pili kānāwai o nā 'āina like 'ole i mea e kuhikuhi ho'olalau ai i ka lehulehu ma ka no'ono'o 'ana ua kū nō kā lākou hana i ke kānāwai.

Eia lā ke ho'olaule'a 'ia ala ka mea i 'ōlelo 'ia 'o ka moku'āina 50 o 'Amelika Hui 'ia; he 50 a 'oi mau makahiki o ka hūnā hilahila 'ana i ka 'oia'i'o.

———

E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

» .(JavaScript must be enabled to view this email address)

» .(JavaScript must be enabled to view this email address)

a i ‘ole ia, ma ke kelepona:

» 956-2627 (Laiana)

» 956-2624 (Kekeha)

This column is coordinated by the Hawaiian Language Department at the University of Hawai'i at Mānoa, supported by the Initiative for Achieving Native Hawaiian Academic Excellence.