Quantcast
StarBulletin.com

Aia ia wai ka mana koho?


By

POSTED: Saturday, January 31, 2009
               

     

 

Synopsis: Can $819 billion really stimulate the economy? The bill passed with votes cast along party lines; suggesting that it doesn't really matter to the folks on Capitol Hill.

       

Aloha hou mai kākou e o'u mau hoa heluhelu. Ke hā'awi aku nei au i ko'u mahalo piha iā 'oukou no ka ho'omanawanui 'ana i ka ho'opa'a 'ana i ka 'ōlelo kanaka a no ke kāko'o 'ana ho'i i ka ho'ōla hou a me ka ho'olaha pū aku ma 'ō a ma 'ane'i o ko kākou 'āina aloha. A ua lilo ho'i i mea e 'oli'oli ai ko'u na'au ka hālāwai 'ana me kauwahi makamaka heluhelu ma ke alanui a me ko 'oukou hō'oia 'ana mai ē he mau po'e nō e heluhelu nei i nēia wahi kolamu a kākou.

  I ka Pō'alua a'e nei, ua holo ka pila a Pelekikena Barack Obama i waiho akula i mua o ka Hale o nā lunamaka'āinana o 'Amelika Hui Pū 'Ia e 'ae 'ia ana ka ho'olilo 'ana ma kahi o $819,000,000,000. Auē nō ho'i ē ka nui o nā “0” ma loko o ia helu. Ua 'ane'ane e piha $1,000,000,000,000! I kālā ho'āla nō ho'i ia i ka pō'aiawaiwai 'a'alina o 'Amelika i pa'uhia i ka hiamoe, a e ho'āla pū ai nō ho'i me ka pō'aiawaiwai o ka honua nei a puni. He mana'o akamai paha kēia, 'a'ole paha. Ua koe aku ia. Eia nō nā lae'ula kālai pō'aiawaiwai ke ho'opa’apa’a nei no ka makepono a me ka makehewa paha o ka ho'olilo 'ana i kēia heluna kālā a ka nunui launa 'ole mai. Aia na'e ka mana i ka lima o nā lunamaka'āinana a me nā kenekoa, he po'e 'ike nō i ia mea he politika. He 'ike anei ko lākou i nā hana e ala hou ai ka pō’aiawaiwai? 'A'ole lā! Ua like kēlā me ke kanaka i loa’a ke kekelē lae'ula ma ka māhele mo'olelo e kaena aku nei i mua o ke ākea no kona ‘ike i ka ho'ona'auao a i 'ole ka hana lā'au lapa'au. 'A'ole nō e nele kona 'aka'aka 'ia e nā kānaka 'ike maoli o ke ao mālamalama!

  'O ko kākou waiho 'ana i ka mana i loko o ko lākou lā mau lima no ka ho'oholo 'ana i ka ha'ina kūpono e puka ai ma kēia hihia, 'o ia nō 'oe 'o ke alaka'i 'ana a ka makapō i ke kuli. Eia hou kekahi, ma ko lākou koho 'ana i ke kāko'o a kū'ē paha i kēia pila, 'a'ole nānā 'ia ka pono o ka lehulehu. He nānā wale 'ia nō ko lākou pono pono'ī, no ka mea, e koikoi 'ia nō lākou e nā luna o ko lākou 'ao'ao he Lepupalika a he Kemokalaka paha e ho'olōkahi ma ke koho 'ana i ho'okahi nō koho o ko lākou 'ao'ao. Aia ke koho hou 'ia o kēlā mau lunamaka'āinana a kenekoa paha a maliu aku i ka 'ōlelo a ua po'e luna lā. A no laila, he mea 'ole ka makepono a makehewa paha o ia pila i mua o ka lehulehu, 'o ka pono o ka 'ao'ao ke nānā 'ia a pēlā e mau ai ka hukihuki o ia mau 'ao'ao a i 'elua.

  Me he mea lā, ua kū'ai 'ia ka mana koho o ia po'e 'elele e ko lākou mau 'ao'ao i pili ai. Inā pēlā, he aha lā ka hewa o kahi Rod Blagojevich e ho'ohalahala 'ia nei? Inā pololei nā 'ōlelo hō'āhewa e pili ana i kāna hana, ua hewa pū me kēia po'e 'elele kekahi. 'A'ohe he wehena i laila. E hō'āhewa pū 'ia lākou!

               

     

 

E ho'ouna 'ia mai nā leka iā māua, 'o ia ho'i 'o Laiana Wong a me Kekeha Solis ma ka pahu leka uila ma lalo nei:

»  .(JavaScript must be enabled to view this email address)
»  .(JavaScript must be enabled to view this email address)

       

a i ‘ole ia, ma ke kelepona:
»  956-2627 (Laiana)
»  956-2624 (Kekeha)

       

This column is coordinated by the Hawaiian Language Department at the University of Hawai'i at Mānoa, supported by the Initiative for Achieving Native Hawaiian Academic Excellence.