Aloha mai nō kākou e o'u mau hoa makamaka o Kauakūkalahale. I ke aumoe o ka pō nei, i ka wā ho'i e nanea ana ka maka i ka nānā kīwī, kupu hou mai nō ia mo'olelo ho'ouluhua na'au e pili ana iā Bernard Madoff, ke ka'aka i hana 'ino nui aku i kona mau hoaaloha me ka waiho mai ho'i iā lākou ma ka'e alanui me ke kūlana kūpiliki'i. He hana 'āpuka kā ia ala a emi loa ai ka waiwai o kona mau hoa a eia nō lākou ke ho'omanawanui nei i ka hemahema o ka nohona 'ilihune. Ua pi'i 'ino ka heu a pi'i pū ho'i me ka minamina lua i ka ua mea 'o ka hilina'i aku i ko lākou hoa. Kainō e kū'ono'ono ana ka nohona o ka wā haumaka'iole, eia kā, 'o ka puni wale aku a ka hāpōpō, pau koke kona waiwai i ka 'iole!

  'O ku'u hiapo kekahi o ka nānā pū 'ana me a'u, a i lohe aku ka hana ona i ke kūkala hou 'ia mai o ua mo'olelo nei, nīele maila 'o ia ala no ke 'ano o ka ho'opa'i e pono ai . Pehea lā e kū ai ka mākaia o ua po'e hoa ho'opukapuka nei i hei wale mai i ka 'upena a Madoff? 'A'ole ho'opa'i e ola hou ai ka 'eha a me ka hilahila. Eia hou ho'i, 'o ka mea ma'a mau i nā 'aha ho'okolokolo 'Amelika ka pa'i mālie wale 'ana nō i ka lima o ia 'ano 'u'a. Ke ho'opa'a 'ia i ka hale pa'ahao 'o ia nō 'oe 'o ka noho luakaha 'ana ma ka hōkele. 'A'ohe wahi 'ano o ka 'o'ole'a o ia ho'opa'i. Eia na'e ka mea 'āpiki, ua pili wale nō ia 'ano ho'opa'i mālie i ka po'e waiwai a maka hanohano paha. 'O ka mea 'ilihune, inā he pōā a pākaha paha ka hana a i 'ole ia 'o ke kū'ai lā'au 'ona, 'a'ole o kana mai ka 'o'ole'a o ka ho'opa'i. A i ka ho'omaopopo 'ana iho o ka'u hiapo i kēia kūlana kaulike 'ole, 'ōlelo maila kēlā no ka makehewa o ka pōā a me ka makepono o ka hana 'āpuka. Aloha nō! 'A'ohe a'u 'ōlelo e hō'ole ai i ia mana'o ona.

  Eia mai ka 'āpiki o nā 'āpiki. Inā e nānā 'ia ke 'ano o nā kānaka nāna e lawelawe i kēia mau 'ano kalaima, 'oko'a ka lāhui o kahi a me kahi. 'O ka hapanui o nā pōā, he po'e 'ilihune a ikaika o ka 'ili, a 'o ka hapanui o nā 'āpuka, he po'e 'ilipuakea kū'ono'ono o ka nohona. A no laila, he ho'okae 'ili ka mālama 'ia o kēia mau ho'opa'i kaulike 'ole. A i hewa ho'i iā wai? I hewa i nā 'aha ho'okolokolo 'Amelika no ka ho'omau 'ana i ia hana.

  Ua 'ōlelo 'ia ē 'o ka maka'u wale o ka po'e waiwai o pō'ino auane'i i ka limanui 'ia e ka po'e pōwā 'ilihune, lilo ia kalaima he mea ho'opa'i 'o'ole'a 'ia. A 'o ka hana 'āpuka, he hana pepa wale nō, a no laila, he mea 'ole ka ho'opa'i. A i hopu 'ia ka 'āpuka, 'a'ole 'o ia ho'ouna 'ia i ka hale pa'ahao ho'okahi e pa'a ai nā pōā. Ma 'Amelika, he mea 'ino loa ka pōā nāna e 'aihue he mau haneli wale nō kālā. 'O ka 'āpuka na'e i lilo iā ia he $50 biliona, 'a'ohe āna 'eha e maka'u ai.