Hoopae ia ka Ike Manomano o ka Hawaii

Synopsis: The author resided in Aotearoa from January to June while attending Waikato University. Here is an account of some events that occurred while he was there.

Mai ka mahina o Ianuali a hiki i keia Iune, ua nui na hui a me ka poe kanaka Hawaii i hele i Aotearoa no na ano kumu like ole. He hoonaauao ke kumu nui o ia mau huakai. O kekahi o na aha, malama ia i keia Malaki nei ma ke Kulanui o Waikato i Hamilton. Haiolelo ekolu poe kanaka oiwi imi naauao ma ke kulana PhD. O Keanu Sai kekahi i haiolelo no kana papa hana noii e pili ana i ka hoomau ia o ke kulana kuokoa o Ke Aupuni Moi o Hawaii. Haiolelo pu o Dr. Keaweaimoku Kaholokula pili i kana hana noii, o ke kulana olakino o ka poe kane oiwi Hawaii. Alaila, haiolelo nohoi keia mea kakau no kana hana noii pili i ke ano o ka olelo Hawaii o keia au hou.

Ma Malaki nei, ua hele aku kekahi hui no ke Kulanui Kaiaulu o Hawaii ma Hilo i Aotearoa no ka hoikeike aku i ke ano o ka hula a me na mele Hawaii. O Dr. Taupouri Tangaro laua o Ms. Kekuhi Kealiikanakaole na alakai o ua hui la. He 22 poe haumana na lala o ka hui o ka papa hula a me ka haawina ike Hawaii o ia kulanui. Ua huakai ia hui i kekahi mau kaona ma Aotearoa no ka hoikeike aku i ka hula.

Ua hele aku kekahi hui no ka hoikeike i kekahi mea pomaikai hou, o ka hoolele ia o kekahi mahele hai nu hou ma ke KGMB i ke kakahiaka ma Hawaii nei. O ka poe nana ia papa hana, oia hoi o Ms. Amy Kalili me Dr. Hiapo Pereira a me kekahi poe hoa ka poe i hele no ka hoikeike aku ia nu hou a ao pu lakou i kekahi o na hana o ka poe Maori ma ka pahu hoolele kii.

Ma Iune iho nei, ua hele aku 26 poe haumana me na kumu o ke Kula Hoonaauao o ke Kulanui o Hawaii ma Manoa i Aotearoa no ke komo i kekahi aha kuka pili i ke kakau ana i na moolelo no na puke hoikeike naauao a hele pu nohoi ka halau hula o Ka Pa Hula o ka Lei Lehua no Honolulu nei me ke kumu hula o Ms. Snowbird Bento no ka hoikeike aku i ka hula a me kekahi hana keaka no Mauiakalana laua o Kamapuaa ma na kaona like ole o ia aina. He 50 ka nui o ka poe o ia halau hula me na hoa i hele.

Ua nui loa no na olelo hoomaikai kiekie i hoike ia mai i keia mea kakau e na poe like ole o Aotearoa o ke kulana kiekie a haahaa nohoi o ia apana aku a ia apana aku. O kekahi o ka hoike ana, he eehia maoli ke kulana ihiihi o ka naauao i hoike ia e ka poe Hawaii i huakai ia aina. He mea ia e haaheo ai ka poe Hawaii no ka laula o na kumuhana i naauao ai ka poe o Hawaii nei. E hoonui hou ia aku na kumuhana e hoopae ia ai ka ike manomano o na kupuna o kakou ma ia aina aku a ia aina aku; aole ma na aina olelo Pelekania wale no, aka, e imi nohoi kakou i na ala e ao aku a ao mai ai i ka ike me ka naauao ma na aina like ole o ka Pakipika.

Hoopae ia ka Ike Manomano o ka Hawaii

Synopsis: The author resided in Aotearoa from January to June while attending Waikato University. Here is an account of some events that occurred while he was there.

Mai ka mahina o Ianuali a hiki i keia Iune, ua nui na hui a me ka poe kanaka Hawaii i hele i Aotearoa no na ano kumu like ole. He hoonaauao ke kumu nui o ia mau huakai. O kekahi o na aha, malama ia i keia Malaki nei ma ke Kulanui o Waikato i Hamilton. Haiolelo ekolu poe kanaka oiwi imi naauao ma ke kulana PhD. O Keanu Sai kekahi i haiolelo no kana papa hana noii e pili ana i ka hoomau ia o ke kulana kuokoa o Ke Aupuni Moi o Hawaii. Haiolelo pu o Dr. Keaweaimoku Kaholokula pili i kana hana noii, o ke kulana olakino o ka poe kane oiwi Hawaii. Alaila, haiolelo nohoi keia mea kakau no kana hana noii pili i ke ano o ka olelo Hawaii o keia au hou.

Ma Malaki nei, ua hele aku kekahi hui no ke Kulanui Kaiaulu o Hawaii ma Hilo i Aotearoa no ka hoikeike aku i ke ano o ka hula a me na mele Hawaii. O Dr. Taupouri Tangaro laua o Ms. Kekuhi Kealiikanakaole na alakai o ua hui la. He 22 poe haumana na lala o ka hui o ka papa hula a me ka haawina ike Hawaii o ia kulanui. Ua huakai ia hui i kekahi mau kaona ma Aotearoa no ka hoikeike aku i ka hula.

Ua hele aku kekahi hui no ka hoikeike i kekahi mea pomaikai hou, o ka hoolele ia o kekahi mahele hai nu hou ma ke KGMB i ke kakahiaka ma Hawaii nei. O ka poe nana ia papa hana, oia hoi o Ms. Amy Kalili me Dr. Hiapo Pereira a me kekahi poe hoa ka poe i hele no ka hoikeike aku ia nu hou a ao pu lakou i kekahi o na hana o ka poe Maori ma ka pahu hoolele kii.

Ma Iune iho nei, ua hele aku 26 poe haumana me na kumu o ke Kula Hoonaauao o ke Kulanui o Hawaii ma Manoa i Aotearoa no ke komo i kekahi aha kuka pili i ke kakau ana i na moolelo no na puke hoikeike naauao a hele pu nohoi ka halau hula o Ka Pa Hula o ka Lei Lehua no Honolulu nei me ke kumu hula o Ms. Snowbird Bento no ka hoikeike aku i ka hula a me kekahi hana keaka no Mauiakalana laua o Kamapuaa ma na kaona like ole o ia aina. He 50 ka nui o ka poe o ia halau hula me na hoa i hele.

Ua nui loa no na olelo hoomaikai kiekie i hoike ia mai i keia mea kakau e na poe like ole o Aotearoa o ke kulana kiekie a haahaa nohoi o ia apana aku a ia apana aku. O kekahi o ka hoike ana, he eehia maoli ke kulana ihiihi o ka naauao i hoike ia e ka poe Hawaii i huakai ia aina. He mea ia e haaheo ai ka poe Hawaii no ka laula o na kumuhana i naauao ai ka poe o Hawaii nei. E hoonui hou ia aku na kumuhana e hoopae ia ai ka ike manomano o na kupuna o kakou ma ia aina aku a ia aina aku; aole ma na aina olelo Pelekania wale no, aka, e imi nohoi kakou i na ala e ao aku a ao mai ai i ka ike me ka naauao ma na aina like ole o ka Pakipika.