— ADVERTISEMENT —
Starbulletin.com

Kauakukalahale
Sunday, September 12, 2004



Note: Because most Web browsers are unable to display the kahako (horizontal line, or macron) used to add emphasis to a vowel in written Hawaiian, we have substituted the corresponding vowel with an umlaut (two dots, or dieresis). To view this text as it was meant to be read, you must have a Hawaiian-language font installed on your computer. You can obtain free versions of these fonts from the University of Hawaii-Hilo's Web site, http://www.olelo.hawaii.edu/eng/resources/fonts.html

Some newer Web browsers, (such as Netscape 7 and Internet Explorer 6 on certain operating systems) can display kahako without a Hawaiian-language font, using a specialized coding system called Unicode. To jump to a Unicode version of this column, click here.



A He Nani Mänoa


Synopsis: Mänoa's own Kimo Alama Keaulana and his musical group Lei Hulu will set stage this Friday, the 17th of September at Mänoa Gardens located on the University of Hawai'i-Mänoa campus from 7:00 - 9:30 pm to help Ho'okani Mänoa Reminisce.


He nani 'o Mänoa wehi i ka ua

Ka ua Tuahine kupa o ka 'äina

'O ia ihola nö ka puana a i lohe 'ia, mai 'ö a 'ö o nei pae 'äina a puni. Mai ka pi'ina o ka lä i Ha'eha'e a hiki i kona welo ha'aheo 'ana i Lehua a kau loa aku i Kahiki. A i Kahiki akula a ho'i mai i ka 'äina kaulana lua 'ole nei o ke kupa Hawai'i.

Kuku'i 'ia akula ke kaulana o nei manu kani leo le'a ma nä kihi 'ehä o nei 'äina, mai kahi pae a kahi pae aku o nä kai 'ewalu, mai nä piko köaheahe o nä kuahiwi 'elima o Keawe, a i nä hono a'o Pi'ilani e noho ala i ka malu ulu a'o Lele, a kau mai nei i O'ahu uluwehi i ka 'ilima, a pae akula i Kaua'i o Mano hemolele wale i ka mälie. 'A'ohe wahi kü'ono iki i lohe 'ole 'ia ai ka nahenahe küpono o nei leo honehone o ka hula.

'Oiai käkou e kipa nei i ke au ma mua a'e nei ma o ka nani laha 'ole o nä mele o ia au, he pono nö ke hali'a pü aku me ko käkou hoa kipa i këia Pö'alima, ma Ho'okani Mänoa, 'o ia ho'i 'o Kimo Alama Keaulana a me kona 'äuna hïmeni 'o Lei Hulu. 'A'ole këia he malihini i ka maka o käkou nä känaka puni mele Hawai'i, a 'a'ole nö ho'i ia he kani hou i ka pepeiao ke lohe mai. No nä makahiki he kanakolu a 'oi iki nö paha ka lö'ihi o ka ho'okani 'ana o nei pu'u kani. I ka makahiki 1978 i puka mai ai käna päleo mua 'o ia ho'i 'o Cha-lang-a-lang Today, me ka hui hïmeni 'o Halona. I ka makahiki 1991 i puka mai ai käna cëdë i kapa 'ia kona inoa 'o Lei Hulu Sings for the Hula. Mai ia manawa mai, 'a'ole i ho'opuka 'ia kahi cëdë hou, a i këia mahina. I këia mahina 'o Kepakemapa nei e puka mai ai he cëdë hou ma ka inoa i 'ike 'ia aku nei, 'o ia nö 'o Hula Lives. Nui nö ka hau'oli o ke kama-'äina a me ka po'e malihini i ka lohe 'ana mai i këia nühou i 'ö'ili mai nei, a maika'i ke kü'ai mai i ia 'ano cëdë i piha pono i nä mele kaulana o ka 'äina. Ke 'ole ka maka'ala 'ana aku, pau koke ana paha ia i ke kü'ai 'ia mai e ka 'eleu mikimiki.

'A'ole ma laila wale nö ke kalena o nei kupu'eu o Hawai'i, he polopeka nö ho'i 'o ia ma Ke Kula Kaiäulu 'o Honolulu (HCC). He kumu hula nö ho'i 'o ia no nä makahiki he kanakolu a 'oi iki paha. Ua kapa 'ia ka inoa o käna hälau e a'o nei, 'o Lei Hulu Hula School. Ma 'ane'i paha kahi küpono e ho'omaika'i aku ai i ka mea näna 'o ia i a'o, 'o ia nö 'o Adeline Maunupau Lee. Me ia ala nö ko mäkou mahalo a nui loa, a pëlä pü nö ho'i me ko käkou hoa kipa...

Lehu-a-lehu ka mahalo ku'u puana

Nou e Kimo makamae he inoa

-- na'u, na Keawe Lopes

['Auhea 'oukou, e naue aku i Mänoa Gardens i këia Pö'alima no Ho'okani Mänoa, a e ho'onanea i ka leo nahenahe o Kimo Alama Keaulana a me Lei Hulu. Ke lohe 'ia ko läkou mau leo honehone, e kau mai ana nä ha-li'a aloha i ke au i hala. Ho'omaka 'o Ho'okani Mänoa i ka hola 7:00 o ke ahiahi, a i ka hola 9:30 e hä'awi ai i ke aloha i nä hoa a huli ho'i i kauhale.]





E ho'ouna 'ia mai nä leka iä mäua,
'o ia ho'i 'o Laiana Wong a me Kekeha Solis
ma ka pahu leka uila ma lalo nei:
>> kwong@hawaii.edu
>> rsolis@hawaii.edu

a i 'ole ia, ma ke kelepona:
>> 956-2627 (Laiana)
>> 956-2624 (Kekeha)



BACK TO TOP
|

Note: This version of the column is set in Unicode, which requires current Web-browser software (Netscape 7 or Internet Explorer 6 on most operating systems.) If the Hawaiian text below does not display properly, you may want to use the version coded for older browsers (above) instead.

A He Nani Mānoa


Synopsis: Mānoa's own Kimo Alama Keaulana and his musical group Lei Hulu will set stage this Friday, the 17th of September at Mānoa Gardens located on the University of Hawai'i-Mānoa campus from 7:00 - 9:30 pm to help Ho'okani Mānoa Reminisce.


He nani 'o Mānoa wehi i ka ua

Ka ua Tuahine kupa o ka 'āina

'O ia ihola nō ka puana a i lohe 'ia, mai 'ō a 'ō o nei pae 'āina a puni. Mai ka pi'ina o ka lā i Ha'eha'e a hiki i kona welo ha'aheo 'ana i Lehua a kau loa aku i Kahiki. A i Kahiki akula a ho'i mai i ka 'āina kaulana lua 'ole nei o ke kupa Hawai'i.

Kuku'i 'ia akula ke kaulana o nei manu kani leo le'a ma nā kihi 'ehā o nei 'āina, mai kahi pae a kahi pae aku o nā kai 'ewalu, mai nā piko kōaheahe o nā kuahiwi 'elima o Keawe, a i nā hono a'o Pi'ilani e noho ala i ka malu ulu a'o Lele, a kau mai nei i O'ahu uluwehi i ka 'ilima, a pae akula i Kaua'i o Mano hemolele wale i ka mālie. 'A'ohe wahi kū'ono iki i lohe 'ole 'ia ai ka nahenahe kūpono o nei leo honehone o ka hula.

'Oiai kākou e kipa nei i ke au ma mua a'e nei ma o ka nani laha 'ole o nā mele o ia au, he pono nō ke hali'a pū aku me ko kākou hoa kipa i kēia Pō'alima, ma Ho'okani Mānoa, 'o ia ho'i 'o Kimo Alama Keaulana a me kona 'āuna hīmeni 'o Lei Hulu. 'A'ole kēia he malihini i ka maka o kākou nā kānaka puni mele Hawai'i, a 'a'ole nō ho'i ia he kani hou i ka pepeiao ke lohe mai. No nā makahiki he kanakolu a 'oi iki nō paha ka lō'ihi o ka ho'okani 'ana o nei pu'u kani. I ka makahiki 1978 i puka mai ai kāna pāleo mua 'o ia ho'i 'o Cha-lang-a-lang Today, me ka hui hīmeni 'o Halona. I ka makahiki 1991 i puka mai ai kāna cēdē i kapa 'ia kona inoa 'o Lei Hulu Sings for the Hula. Mai ia manawa mai, 'a'ole i ho'opuka 'ia kahi cēdē hou, a i kēia mahina. I kēia mahina 'o Kepakemapa nei e puka mai ai he cēdē hou ma ka inoa i 'ike 'ia aku nei, 'o ia nō 'o Hula Lives. Nui nō ka hau'oli o ke kama-'āina a me ka po'e malihini i ka lohe 'ana mai i kēia nūhou i 'ō'ili mai nei, a maika'i ke kū'ai mai i ia 'ano cēdē i piha pono i nā mele kaulana o ka 'āina. Ke 'ole ka maka'ala 'ana aku, pau koke ana paha ia i ke kū'ai 'ia mai e ka 'eleu mikimiki.

'A'ole ma laila wale nō ke kalena o nei kupu'eu o Hawai'i, he polopeka nō ho'i 'o ia ma Ke Kula Kaiāulu 'o Honolulu (HCC). He kumu hula nō ho'i 'o ia no nā makahiki he kanakolu a 'oi iki paha. Ua kapa 'ia ka inoa o kāna hālau e a'o nei, 'o Lei Hulu Hula School. Ma 'ane'i paha kahi kūpono e ho'omaika'i aku ai i ka mea nāna 'o ia i a'o, 'o ia nō 'o Adeline Maunupau Lee. Me ia ala nō ko mākou mahalo a nui loa, a pēlā pū nō ho'i me ko kākou hoa kipa...

Lehu-a-lehu ka mahalo ku'u puana

Nou e Kimo makamae he inoa

-- na'u, na Keawe Lopes

['Auhea 'oukou, e naue aku i Mānoa Gardens i kēia Pō'alima no Ho'okani Mānoa, a e ho'onanea i ka leo nahenahe o Kimo Alama Keaulana a me Lei Hulu. Ke lohe 'ia ko lākou mau leo honehone, e kau mai ana nā ha-li'a aloha i ke au i hala. Ho'omaka 'o Ho'okani Mānoa i ka hola 7:00 o ke ahiahi, a i ka hola 9:30 e hā'awi ai i ke aloha i nā hoa a huli ho'i i kauhale.]





E ho'ouna 'ia mai nā leka iā māua,
'o ia ho'i 'o Laiana Wong a me Kekeha Solis
ma ka pahu leka uila ma lalo nei:
>> kwong@hawaii.edu
>> rsolis@hawaii.edu

a i 'ole ia, ma ke kelepona:
>> 956-2627 (Laiana)
>> 956-2624 (Kekeha)

This column is coordinated by the Hawaiian Language Department
at the University of Hawai'i at Mānoa, supported by UH
President Evan Dobelle's Initiative for Achieving Native Hawaiian
Academic Excellence.

— ADVERTISEMENTS —

— ADVERTISEMENTS —


| | | PRINTER-FRIENDLY VERSION
E-mail to City Desk

BACK TO TOP


Text Site Directory:
[News] [Business] [Features] [Sports] [Editorial] [Do It Electric!]
[Classified Ads] [Search] [Subscribe] [Info] [Letter to Editor]
[Feedback]
© 2004 Honolulu Star-Bulletin -- http://archives.starbulletin.com


-Advertisement-