Kekeha Solis
Note: Because most Web browsers are unable to display the kahako (horizontal line, or macron) used to add emphasis to a vowel in written Hawaiian, we have substituted the corresponding vowel with an umlaut (two dots, or dieresis). To view this text as it was meant to be read, you must have a Hawaiian-language font installed on your computer. You can obtain free versions of these fonts from the University of Hawaii-Hilo's Web site, http://www.olelo.hawaii.edu/eng/resources/fonts.html
Some newer Web browsers, (such as Netscape 7 and Internet Explorer 6 on certain operating systems) can display kahako without a Hawaiian-language font, using a specialized coding system called Unicode. To jump to a Unicode version of this column, click here.
‘Ino! Ke po‘i
mai nei ka nalu
Synopsis: The article addresses the issue of Kamehameha's settlement and related issues.Aloha mai käkou e nä makamaka heluhelu o këia kolamu 'ölelo Hawai'i. Eia hou nö kahi po'omana'o e kau a'ela ma luna.
I ko'u heluhelu 'ana mai i nä nüpepa puka lä 'elua o Honolulu nei i këia pule nei, kaumaha ihola ko'u na'au i nä mo'olelo e pili ana i ka hihia o Kamehameha. 'O ke kumu mua i kaumaha ai ko'u na'au, 'o ia ka 'aelike o nä kahu waiwai o Kamehameha me ka mea näna i ho'opi'i iä läkou. 'O ka lua o ke kumu, 'o ia ka hana a nä känaka 'ekolu i hö'ike a'e nei, na läkou 'ekolu e ho'oka'a i kahi hapa o nä pila o ia 'ao'ao ho'opi'i. 'O ke kolu o ke kumu, 'o ia ka ho'olauwili 'ia 'ana o ka 'ölelo. 'O ka hä, 'o ia ka na'aupö. Eia mai kahi mau mana'o no nä kumu 'ehä i kani ai ka 'uhü.
1) 'O ka 'aelike i 'äpono 'ia aku nei ma ka Pö'ahä nei. He hä'awi pio nö ke 'ano o ia 'aelike. Ua nui nö nä känaka e käko'o ana i ke kula 'o Kamehameha, e kü ana ho'i i ka pono, no ka pono, ua mäkaukau nö "e alu ka pule iä Hakalau," 'o ia ho'i, e pule like nä känaka kü i ka pono no ka pono o ka Hawai'i a 'o ia ka mea e puka ai a e kö ai paha ka mana'o. Aia ka pono 'o ka huliamahi 'ana.
2) 'O nä känaka 'ekolu näna e käko'o i ka 'ao'ao ho'opi'i. Me he mea lä he mea mau nö këia i ke Kakina me kona mau hoa aloha, 'o ia ke kä'ili 'ana i ko ha'i a me ka hana 'ino i ka Hawai'i. Wahi a kahiko, "Ua kü nö i ka mäna." 'O ia ho'i, ua kü ke keiki i ka mea näna 'o ia i hänai.
3) 'O ka ho'olauwili 'ia 'ana o ka 'ölelo. Ma ka palapala kauoha a ke Ali'iwahine Pauahi, he hö'ike pololei ua Ali'iwahine nei a käkou i kona makemake, 'o ia ho'i, e ho'okomo mua 'ia nä keiki Hawai'i piha koko Hawai'i, a me nä keiki i hapa mai ke koko Hawai'i. Wahi a ka lunakänäwai David Ezra ('Ekala), "He wahine akamai maoli 'o ia. Ua maopopo ke känäwai iä ia." Na wai ka 'ole o ke akamai, he ala i ma'a i ka hele 'ia e kona mau mäkua, he keu ke Ali'iwahine a ke akamai, ua maopopo nö ke känäwai iä ia a ua kuhi pono paha i ka ho'ä'o 'ana o ke kölea e pö'alo mai i ka maka o nä Hawai'i, a 'o ia paha käna kumu i käkau pono ai i ka palapala kauoha me ka hö'ike pü 'ana mai, he mea nui ka mo'okü'auhau o ke keiki.
A no ka hänai a me ka ho'okama 'ana, wahi a Handy me Pukui (1972), 'o ka ho'äo, ka ho'okama, a me ka hänai, he mau mea launa pü (social) ia, 'a'ole ia he mea kü i ka mo'okü'auhau (biological). A 'a'ole o kana mai ka nui o ke aloha o ka makua i ke keiki hänai a i ke keiki ho'okama paha. Wahi a Pukui, Haertig, me Lee (1972), 'o ka 'ohana, no ka piko like nö ia, a 'o ka pilikoko (pëlä pü me ka hänai a me ka ho'okama), 'o ia ka mea nui o ka 'ohana. A 'o ia mea he 'ohana, 'o ke aloha ia kekahi i kekahi, pëlä pü me ke kökua, ke käko'o a me ia mea aku ia mea aku. 'A'ole i 'ölelo iki 'ia e loli ka mo'okü'auhau.
4) 'O ka na'aupö. He pilikia nui këia. A ma muli o ia pilikia, he pono ke ho'ona'auao 'ia nä käne, wähine me nä keiki, mai ke nui a ka li'ili'i ma ka mo'olelo o nä Hawai'i o kuhihewa auane'i, e like me kä käkou mea e 'ike maka nei i këia manawa.
Ua lawa paha këia. Eia ko Mänoa keiki ke ho'i aku nei, ua ahiahi. Ke aloha nö.
E ho'ouna 'ia mai nä leka iä mäua,
'o ia ho'i 'o Laiana Wong a me Kekeha Solis
ma ka pahu leka uila ma lalo nei:
>> kwong@hawaii.edu
>> rsolis@hawaii.edu
a i 'ole ia, ma ke kelepona:
>> 956-2627 (Laiana)
>> 956-2624 (Kekeha)
BACK TO TOP |
Note: This version of the column is set in Unicode, which requires current Web-browser software (Netscape 7 or Internet Explorer 6 on most operating systems.) If the Hawaiian text below does not display properly, you may want to use the version coded for older browsers (above) instead.‘Ino! Ke po‘i
mai nei ka nalu
Synopsis: The article addresses the issue of Kamehameha's settlement and related issues.Aloha mai kākou e nā makamaka heluhelu o kēia kolamu 'ōlelo Hawai'i. Eia hou nō kahi po'omana'o e kau a'ela ma luna.
I ko'u heluhelu 'ana mai i nā nūpepa puka lā 'elua o Honolulu nei i kēia pule nei, kaumaha ihola ko'u na'au i nā mo'olelo e pili ana i ka hihia o Kamehameha. 'O ke kumu mua i kaumaha ai ko'u na'au, 'o ia ka 'aelike o nā kahu waiwai o Kamehameha me ka mea nāna i ho'opi'i iā lākou. 'O ka lua o ke kumu, 'o ia ka hana a nā kānaka 'ekolu i hō'ike a'e nei, na lākou 'ekolu e ho'oka'a i kahi hapa o nā pila o ia 'ao'ao ho'opi'i. 'O ke kolu o ke kumu, 'o ia ka ho'olauwili 'ia 'ana o ka 'ōlelo. 'O ka hā, 'o ia ka na'aupō. Eia mai kahi mau mana'o no nā kumu 'ehā i kani ai ka 'uhū.
1) 'O ka 'aelike i 'āpono 'ia aku nei ma ka Pō'ahā nei. He hā'awi pio nō ke 'ano o ia 'aelike. Ua nui nō nā kānaka e kāko'o ana i ke kula 'o Kamehameha, e kū ana ho'i i ka pono, no ka pono, ua mākaukau nō "e alu ka pule iā Hakalau," 'o ia ho'i, e pule like nā kānaka kū i ka pono no ka pono o ka Hawai'i a 'o ia ka mea e puka ai a e kō ai paha ka mana'o. Aia ka pono 'o ka huliamahi 'ana.
2) 'O nā kānaka 'ekolu nāna e kāko'o i ka 'ao'ao ho'opi'i. Me he mea lā he mea mau nō kēia i ke Kakina me kona mau hoa aloha, 'o ia ke kā'ili 'ana i ko ha'i a me ka hana 'ino i ka Hawai'i. Wahi a kahiko, "Ua kū nō i ka māna." 'O ia ho'i, ua kū ke keiki i ka mea nāna 'o ia i hānai.
3) 'O ka ho'olauwili 'ia 'ana o ka 'ōlelo. Ma ka palapala kauoha a ke Ali'iwahine Pauahi, he hō'ike pololei ua Ali'iwahine nei a kākou i kona makemake, 'o ia ho'i, e ho'okomo mua 'ia nā keiki Hawai'i piha koko Hawai'i, a me nā keiki i hapa mai ke koko Hawai'i. Wahi a ka lunakānāwai David Ezra ('Ekala), "He wahine akamai maoli 'o ia. Ua maopopo ke kānāwai iā ia." Na wai ka 'ole o ke akamai, he ala i ma'a i ka hele 'ia e kona mau mākua, he keu ke Ali'iwahine a ke akamai, ua maopopo nō ke kānāwai iā ia a ua kuhi pono paha i ka ho'ā'o 'ana o ke kōlea e pō'alo mai i ka maka o nā Hawai'i, a 'o ia paha kāna kumu i kākau pono ai i ka palapala kauoha me ka hō'ike pū 'ana mai, he mea nui ka mo'okū'auhau o ke keiki.
A no ka hānai a me ka ho'okama 'ana, wahi a Handy me Pukui (1972), 'o ka ho'āo, ka ho'okama, a me ka hānai, he mau mea launa pū (social) ia, 'a'ole ia he mea kū i ka mo'okū'auhau (biological). A 'a'ole o kana mai ka nui o ke aloha o ka makua i ke keiki hānai a i ke keiki ho'okama paha. Wahi a Pukui, Haertig, me Lee (1972), 'o ka 'ohana, no ka piko like nō ia, a 'o ka pilikoko (pēlā pū me ka hānai a me ka ho'okama), 'o ia ka mea nui o ka 'ohana. A 'o ia mea he 'ohana, 'o ke aloha ia kekahi i kekahi, pēlā pū me ke kōkua, ke kāko'o a me ia mea aku ia mea aku. 'A'ole i 'ōlelo iki 'ia e loli ka mo'okū'auhau.
4) 'O ka na'aupō. He pilikia nui kēia. A ma muli o ia pilikia, he pono ke ho'ona'auao 'ia nā kāne, wāhine me nā keiki, mai ke nui a ka li'ili'i ma ka mo'olelo o nā Hawai'i o kuhihewa auane'i, e like me kā kākou mea e 'ike maka nei i kēia manawa.
Ua lawa paha kēia. Eia ko Mānoa keiki ke ho'i aku nei, ua ahiahi. Ke aloha nō.
E ho'ouna 'ia mai nā leka iā māua,
'o ia ho'i 'o Laiana Wong a me Kekeha Solis
ma ka pahu leka uila ma lalo nei:
>> kwong@hawaii.edu
>> rsolis@hawaii.edu
a i 'ole ia, ma ke kelepona:
>> 956-2627 (Laiana)
>> 956-2624 (Kekeha)
This column is coordinated by the Hawaiian Language Department
at the University of Hawai'i at Mānoa, supported by UH
President Evan Dobelle's Initiative for Achieving Native Hawaiian
Academic Excellence.
