Starbulletin.com

Kauakukalahale

Kekeha Solis

Sunday, October 19, 2003



Note: Because most Web browsers are unable to display the kahako (horizontal line, or macron) used to add emphasis to a vowel in written Hawaiian, we have substituted the corresponding vowel with an umlaut (two dots, or dieresis). To view this text as it was meant to be read, you must have a Hawaiian-language font installed on your computer. You can obtain free versions of these fonts from the University of Hawaii-Hilo's Web site, http://www.olelo.hawaii.edu/eng/resources/fonts.html

Some newer Web browsers, (such as Netscape 7 and Internet Explorer 6 on certain operating systems) can display kahako without a Hawaiian-language font, using a specialized coding system called Unicode. To jump to a Unicode version of this column, click here.


Holo nui i ka pö
ha‘alele i ke ao


Synopsis: The article addresses the tragic automobile accident on Ala Moana Boulevard.


Aloha mai nö e nä makamaka heluhelu o Kauakükalahale, he mana'o ko ko 'oukou mea käkau i këia lä no ka mea i 'ike 'ia aku nei e ko Hawai'i ma ka hola 4:15 o ka wana'ao o këlä Läpule aku nei, 'o ia ho'i, 'o ka ulia ka'a ma ke alanui 'o Ala Moana. Mina-mina nä 'öpio 'elua i ha'alele mai i këia ola honua nei, ha'alele pü ho'i i ka 'ohana, a me nä hoa aloha. Inä 'a'ole i inu i ka wai kä'ili ao, inä paha ua hiki aku i ka hale me ka palekana i ia pö. 'A'ole ho'i e hihi, ua inu läua 'elua a kena. Ma ka hö'ike a ka kolonelo, 'o ka mea nona ke ka'a, he hapa 'umi päkeneka 'alekohola o kona koko, a 'o ke köko'olua ho'i, he 'elua hapa 'umi päkeneka a 'oi iki paha. 'O ka mea 'äpiki, 'o ua keiki nei nö ke kalaiwa ana i ia pö.

'O kekahi pilikia e 'ike 'ia nei ma nä alanui a puni 'o O'ahu, 'o ia nö ka holo nui 'ana, 'o ka holo "pupule" 'ana ho'i. A 'o kekahi pilikia, 'o ia nö ke kalaiwa 'ana ma lalo o ka malu o ka wai 'ona. A oki loa paha ka holo nui 'ana i ka wä e pöniuniu ai ka no'ono'o i ka wai lohi o Maleka, e like ho'i me ka hana a ua mau 'öpio nei i hö'ike 'ia a'ela ma luna. 'O kahi mea minamina ho'i, he mau känaka hou aku kai 'eha, he 'ekolu ka nui, a ke waiho maila läkou ala ma ka haukapila. A 'o kekahi o läkou, aia nö ma ke külana küpiliki'i.

E 'ole ka lima lokomaika'i o ke Akua, pakele ai läkou 'ekolu, mai make i ka ho'oku'i 'ia 'ana aku 'oiai läkou e holo aku ana ma luna o ke ka'a.

Wahi a kekahi luna aupuni, aia paha ka pono 'o ka ho'opa'i kanono i ka po'e holo nui ma nä alanui, 'o ia ho'i, inä he 30 mile o ka hola, a 'oi aku paha, ma luna a'e o ka palena ke holo, e kä'ili 'ia ke ka'a e ke aupuni. Me he mea lä, aia wale nö a kau ke känäwai, a laila, e pau ka pilikia. Auë, he keu ia luna aupuni a ka hüpö. He mamo paha ia na Wa'awa'aikina'aupö, hoa hänau ho'i no Hu'ahu'alana. 'A'ole ia 'o ka mea e akaku'u ai ka holo nui 'ana ma Hawai'i nei a puni. E nui auane'i paha ka pilikia. Na wai lä e ho'öki i ka holo nui no ka hä'awi pio wale aku i kona ka'a i ka mäka'i. E ho'onui aku ana i ka mämä holo o ke ka'a, i 'ole 'o ia e pa'a i ka hopu 'ia.

'Eä, e nä makamaka heluhelu, 'o ke kumu o ka pilikia, 'o ia nö ka wai lohi o Maleka. 'O ia ka mea e ho'opöniuniu ai i ka no'ono'o, a holo pupule ai ke kanaka mälie o ka holo 'ana.

Ma muli paha o ka ha'awina i 'ike 'ia ma këlä Läpule aku nei, e maka'ala ai käkou i ka pilikia i ka wai 'ona. Aia paha ka pono 'o ka ho'okumu 'ana i ka pü'ali inu wai.



Ho‘okani

Synopsis: Treat your ears to the beautiful Hawaiian music of Keawe Lopes and Lehuakea at the University of Hawai'i on November 7.


E nä makamaka heluhelu, e naue aku i ke Kula Nui o Hawai'i ma Mänoa i ka Pö'alima mua o Nowemapa, ka lä 7 ho'i, no ka ho'olohe 'ana aku i ka leo nahenahe o Keawe Lopes a me Lehuakea. Ma Mänoa Gardens ana ia, a he manuahi ka hele 'ana i laila e ho'onanea ai. Ho'omaka i ka hola 6:00 o ke ahiahi a pau i ka hola 8:30. [LH]




E ho'ouna 'ia mai nä leka iä mäua,
'o ia ho'i 'o Laiana Wong a me Kekeha Solis
ma ka pahu leka uila ma lalo nei:
>> kwong@hawaii.edu
>> rsolis@hawaii.edu

a i 'ole ia, ma ke kelepona:
>> 956-2627 (Laiana)
>> 956-2624 (Kekeha)



BACK TO TOP
|

Note: This version of the column is set in Unicode, which requires current Web-browser software (Netscape 7 or Internet Explorer 6 on most operating systems.) If the Hawaiian text below does not display properly, you may want to use the version coded for older browsers (above) instead.

Holo nui i ka pō
ha‘alele i ke ao


Synopsis: The article addresses the tragic automobile accident on Ala Moana Boulevard.


Aloha mai nō e nā makamaka heluhelu o Kauakūkalahale, he mana'o ko ko 'oukou mea kākau i kēia lā no ka mea i 'ike 'ia aku nei e ko Hawai'i ma ka hola 4:15 o ka wana'ao o kēlā Lāpule aku nei, 'o ia ho'i, 'o ka ulia ka'a ma ke alanui 'o Ala Moana. Mina-mina nā 'ōpio 'elua i ha'alele mai i kēia ola honua nei, ha'alele pū ho'i i ka 'ohana, a me nā hoa aloha. Inā 'a'ole i inu i ka wai kā'ili ao, inā paha ua hiki aku i ka hale me ka palekana i ia pō. 'A'ole ho'i e hihi, ua inu lāua 'elua a kena. Ma ka hō'ike a ka kolonelo, 'o ka mea nona ke ka'a, he hapa 'umi pākeneka 'alekohola o kona koko, a 'o ke kōko'olua ho'i, he 'elua hapa 'umi pākeneka a 'oi iki paha. 'O ka mea 'āpiki, 'o ua keiki nei nō ke kalaiwa ana i ia pō.

'O kekahi pilikia e 'ike 'ia nei ma nā alanui a puni 'o O'ahu, 'o ia nō ka holo nui 'ana, 'o ka holo "pupule" 'ana ho'i. A 'o kekahi pilikia, 'o ia nō ke kalaiwa 'ana ma lalo o ka malu o ka wai 'ona. A oki loa paha ka holo nui 'ana i ka wā e pōniuniu ai ka no'ono'o i ka wai lohi o Maleka, e like ho'i me ka hana a ua mau 'ōpio nei i hō'ike 'ia a'ela ma luna. 'O kahi mea minamina ho'i, he mau kānaka hou aku kai 'eha, he 'ekolu ka nui, a ke waiho maila lākou ala ma ka haukapila. A 'o kekahi o lākou, aia nō ma ke kūlana kūpiliki'i.

E 'ole ka lima lokomaika'i o ke Akua, pakele ai lākou 'ekolu, mai make i ka ho'oku'i 'ia 'ana aku 'oiai lākou e holo aku ana ma luna o ke ka'a.

Wahi a kekahi luna aupuni, aia paha ka pono 'o ka ho'opa'i kanono i ka po'e holo nui ma nā alanui, 'o ia ho'i, inā he 30 mile o ka hola, a 'oi aku paha, ma luna a'e o ka palena ke holo, e kā'ili 'ia ke ka'a e ke aupuni. Me he mea lā, aia wale nō a kau ke kānāwai, a laila, e pau ka pilikia. Auē, he keu ia luna aupuni a ka hūpō. He mamo paha ia na Wa'awa'aikina'aupō, hoa hānau ho'i no Hu'ahu'alana. 'A'ole ia 'o ka mea e akaku'u ai ka holo nui 'ana ma Hawai'i nei a puni. E nui auane'i paha ka pilikia. Na wai lā e ho'ōki i ka holo nui no ka hā'awi pio wale aku i kona ka'a i ka māka'i. E ho'onui aku ana i ka māmā holo o ke ka'a, i 'ole 'o ia e pa'a i ka hopu 'ia.

'Eā, e nā makamaka heluhelu, 'o ke kumu o ka pilikia, 'o ia nō ka wai lohi o Maleka. 'O ia ka mea e ho'opōniuniu ai i ka no'ono'o, a holo pupule ai ke kanaka mālie o ka holo 'ana.

Ma muli paha o ka ha'awina i 'ike 'ia ma kēlā Lāpule aku nei, e maka'ala ai kākou i ka pilikia i ka wai 'ona. Aia paha ka pono 'o ka ho'okumu 'ana i ka pū'ali inu wai.



Ho‘okani

Synopsis: Treat your ears to the beautiful Hawaiian music of Keawe Lopes and Lehuakea at the University of Hawai'i on November 7.


E nā makamaka heluhelu, e naue aku i ke Kula Nui o Hawai'i ma Mānoa i ka Pō'alima mua o Nowemapa, ka lā 7 ho'i, no ka ho'olohe 'ana aku i ka leo nahenahe o Keawe Lopes a me Lehuakea. Ma Mānoa Gardens ana ia, a he manuahi ka hele 'ana i laila e ho'onanea ai. Ho'omaka i ka hola 6:00 o ke ahiahi a pau i ka hola 8:30. [LH]




E ho'ouna 'ia mai nā leka iā māua,
'o ia ho'i 'o Laiana Wong a me Kekeha Solis
ma ka pahu leka uila ma lalo nei:
>> kwong@hawaii.edu
>> rsolis@hawaii.edu

a i 'ole ia, ma ke kelepona:
>> 956-2627 (Laiana)
>> 956-2624 (Kekeha)

This column is coordinated by the Hawaiian Language Department
at the University of Hawai'i at Mānoa, supported by UH
President Evan Dobelle's Initiative for Achieving Native Hawaiian
Academic Excellence.

--Advertisements--
--Advertisements--


| | | PRINTER-FRIENDLY VERSION
E-mail to City Desk

BACK TO TOP


Text Site Directory:
[News] [Business] [Features] [Sports] [Editorial] [Do It Electric!]
[Classified Ads] [Search] [Subscribe] [Info] [Letter to Editor]
[Feedback]
© 2003 Honolulu Star-Bulletin -- http://archives.starbulletin.com


-Advertisement-